गोव्यासाठी अरविंद केजरीवाल यांच्याकडून सहा मोठ्या घोषणा

भाजप आणि काँग्रेसचा कायम भोंगळ कारभार ; मात्र ‘आप’पक्ष दिलेली प्रत्येक आश्वासने नेहमीच पूर्ण करतो” – अरविंद केजरीवाल

*“भाजपने गोव्याला १५ वर्षे भ्रष्टाचार, महागाई, गुन्हेगारी आणि बेरोजगारीशिवाय काहीही दिले नाही; गोमंतकीयांना आता ‘आप’चे सरकार हवे आहे” – वाल्मिकी नाईक*

*“भाजप सरकारमुळे गोमंतकीयांच्या पदरी कायम निराशा ; गोव्याला वाचवण्याची क्षमता केवळ ‘आप’मध्येच आहे” – आमदार कॅप्टन व्हेंझी व्हिएगास*

गोवा खबर :आम आदमी पार्टीचे राष्ट्रीय संयोजक अरविंद केजरीवाल यांनी आज गोव्यासाठी ६ मोठ्या घोषणा केल्या. पणजी येथे आयोजित करण्यात आलेल्या कार्यक्रमाला संबोधित करताना त्यांनी गोमंतकीयांना पुढील आश्वासने दिली.

गोव्यासाठी ‘आप’च्या ६ घोषणा :

* २४ तास वीजपुरवठा आणि प्रत्येक गोमंतकीयाला ३०० युनिट मोफत वीज.

* प्रत्येक महिलेला दरमहा ३,००० रुपये आर्थिक मदत.

* प्रत्येक कुटुंबाला १० लाख रुपयांचा आरोग्य विमा.

* एका महिन्याच्या आत कलम ३९अ रद्द करणार.

* सर्व महिलांना मोफत बस प्रवास.

* प्रत्येक गावात क्रीडांगण उभारणार.

अरविंद केजरीवाल म्हणाले की, गोवा भाजप सरकारच्या कारभारामुळे त्रस्त झाला आहे. एकीकडे आमदार साध्या जीवनशैलीतून आलिशान गाड्या आणि मोठ्या बंगल्यांच्या जीवनशैलीकडे वाटचाल करत श्रीमंत होत आहेत, तर दुसरीकडे सामान्य गोमंतकीयांना वाढती वीज बिले, जीवनावश्यक वस्तूंच्या वाढत्या किमती, पाणीटंचाई, बेरोजगारी आणि सर्वव्यापी भ्रष्टाचाराचा सामना करावा लागत आहे.

भ्रष्ट कारभारामुळे भाजपने गोव्याची वाईट अवस्था केली असल्याचा आरोप केजरीवाल यांनी केला. सामान्य गोमंतकीयांना अवाढव्य वीज बिले भरावी लागत असताना, ‘आप’चे सरकार असलेल्या राज्यांमध्ये मोफत वीज दिली जात असल्याचे त्यांनी सांगितले. गृहआधार योजनेचा लाभ मिळवण्यासाठी महिलांना अनेक अटी आणि निकष पूर्ण करावे लागतात. मात्र, पंजाबमध्ये ‘आप’ सरकार कोणत्याही अटी व शर्तींशिवाय प्रत्येक महिलेला आर्थिक मदत देते, असे त्यांनी स्पष्ट केले.

गोव्यातील सरकारी रुग्णालयांवर रुग्णांचा मोठा ताण असून, रुग्णालयांमध्ये गर्दी होत आहे. त्यामुळे गोमंतकीयांना खासगी आरोग्यसेवांवर आपल्या आयुष्यभराची कमाई खर्च करावी लागत आहे. याउलट, ‘आप’ सरकार प्रत्येक कुटुंबाला १० लाख रुपयांपर्यंतचा मोफत आरोग्य विमा उपलब्ध करून देते, असे केजरीवाल म्हणाले.

गोव्यातील प्रत्येक महिलेला पंजाबप्रमाणे मोफत बस प्रवासाची सुविधा दिली जाईल, असे आश्वासनही त्यांनी दिले. यामुळे महिलांना त्यांच्या गरजांसाठी इच्छित ठिकाणी सहज प्रवास करता येईल. गोव्यातील तरुण खेळाडू देशातील सर्वोत्तम खेळाडूंमध्ये गणले जातात. त्यामुळे पंजाबप्रमाणेच गोव्यातील तरुणांनाही जागतिक दर्जाची क्रीडांगणे उपलब्ध करून दिली जातील, असे त्यांनी सांगितले.

कलम ३९अच्या मुद्द्यावरून अरविंद केजरीवाल यांनी भाजपवर जोरदार टीका केली. गोमंतकीयांच्या आणि गोव्याच्या मालकीच्या जमिनी सर्वाधिक बोली लावणाऱ्यांना विकून स्वतःचे खिसे भरणे, हाच भाजपचा उद्देश असल्याचा आरोप त्यांनी केला. गोव्याच्या जमिनींचे संरक्षण करण्याऐवजी त्या विकण्यावर भाजपचा भर असल्याचे ते म्हणाले.

कार्यक्रमादरम्यान उपस्थितांपैकी एका व्यक्तीने ‘आप’च्या या योजनांसाठी निधी कुठून आणणार, असा प्रश्न केजरीवाल यांना विचारला. त्यावर उत्तर देताना त्यांनी सांगितले की, पंजाब आणि दिल्लीमध्ये ‘आप’ने आपली आश्वासने पूर्ण केली आहेत. सरकारच्या अर्थसंकल्पात पैशांची कमतरता हा खरा प्रश्न नसून, सत्ताधारी पक्षाची इच्छाशक्ती आणि राजकीय हेतू महत्त्वाचे असतात.

राजकीय नेत्यांसाठी नेहमीच पैसा उपलब्ध असतो; मात्र सामान्य माणसासाठी पैसा नसल्याचे चित्र दिसते, असे केजरीवाल म्हणाले. गोवा सरकारकडे मोठ्या प्रमाणात आर्थिक संसाधने उपलब्ध आहेत. गरज आहे ती केवळ राजकीय इच्छाशक्तीची. ‘आप’चे सरकार स्थापन झाल्यास सरकारी योजनांचा लाभ सामान्य गोमंतकीयांपर्यंत पोहोचवला जाईल, राजकीय नेत्यांच्या फायद्यासाठी नव्हे, असे त्यांनी स्पष्ट केले.

आम आदमी पार्टीचे गोवा प्रदेशाध्यक्ष वाल्मिकी नाईक म्हणाले की, गोमंतकीय जनता भाजपच्या कारभाराला कंटाळली आहे. भाजपने १५ वर्षांच्या सत्ताकाळात गोव्याला भ्रष्टाचार, महागाई, गुन्हेगारी आणि बेरोजगारी यांशिवाय काहीही दिलेले नाही.

भाजपच्या गैरव्यवस्थापनामुळे आणि ‘स्वतःचे हित सर्वप्रथम’ या मानसिकतेमुळे गोमंतकीयांमध्ये तीव्र नाराजी आहे. त्यामुळे आता जनतेला ‘आप’चे सरकार हवे आहे, असे नाईक यांनी सांगितले.

‘आप’च्या आमदारांनी आपल्या मतदारसंघांमध्ये आरोग्य दवाखाने, क्रीडांगणे उभारणे आणि तरुणांना रोजगार मिळवून देण्यासाठी मदत करणे अशा विविध कामांद्वारे जनतेला सेवा पुरवण्यात सत्ताधारी पक्षाच्या आमदारांपेक्षाही चांगली कामगिरी केली आहे, असेही त्यांनी नमूद केले.

बाणावलीचे ‘आप’चे आमदार कॅप्टन व्हेंझी व्हिएगास यांनी भाजपवर टीका करताना सांगितले की, भाजपने गोव्याचा विनाश करण्याचेच काम केले आहे. विशेषतः पक्षाला आणि त्याच्या नेत्यांना फायदा होईल अशा वेळी गोव्याच्या हिताकडे दुर्लक्ष करण्यात आले.

गोव्याचे भाजपपासून संरक्षण करणे अत्यंत आवश्यक आहे. गोव्याला वाचवण्यासाठी आवश्यक असलेली सिद्ध कामगिरी आणि विश्वासार्ह पर्याय केवळ आम आदमी पार्टीकडेच आहे, असे व्हेंझी व्हिएगास यांनी ठामपणे सांगितले.