शिरोड्यातील दहशत आणि दादागिरी संपविण्याचा काँग्रेसचा निर्धार; जमीन, बेरोजगारी, म्हादई आणि भ्रष्टाचाराच्या मुद्द्यांवरून भाजप सरकारवर चौफेर हल्लाबोल
गोव्यात काँग्रेसची लाट; २०२७ मध्ये सत्तापरिवर्तन अटळ असल्याचा काँग्रेस नेत्यांचा विश्वास
गोवा खबर: गोव्याची भूमी, अस्मिता, पर्यावरण आणि भावी पिढ्यांचे भवितव्य सुरक्षित ठेवण्याचा संकल्प घेऊन निघालेल्या काँग्रेसच्या ‘गोंय राखण यात्रे’च्या दक्षिण गोव्यातील पर्वाला आज शिरोडा मतदारसंघातून उत्साहात प्रारंभ झाला. गोव्यातील सर्व ४० विधानसभा मतदारसंघांतून मार्गक्रमण करणाऱ्या या यात्रेच्या तेराव्या दिवशी काँग्रेस नेत्यांनी जमीन रूपांतरण, वाढती बेरोजगारी, ढासळलेली कायदा व सुव्यवस्था, पर्यावरणाचा ऱ्हास आणि भाजप सरकारच्या कारभारावर जोरदार टीकास्त्र सोडले.
काँग्रेसमधून भाजपमध्ये प्रवेश केलेले आमदार सुभाष शिरोडकर यांच्या मतदारसंघात पोहोचलेल्या या यात्रेच्या प्रारंभी गोवा प्रदेश काँग्रेस कमिटीचे अध्यक्ष गिरीश चोडणकर, विरोधी पक्षनेते युरी आलेमाव आणि अन्य ज्येष्ठ नेत्यांनी श्री बागेश्वर प्रसन्न मंदिरात जाऊन दर्शन घेतले व प्रार्थना केली. महाराष्ट्रातील काँग्रेसचे आमदार विश्वजीत कदम यांनीही यात्रेत सहभागी होऊन गोव्यातील काँग्रेसच्या जनआंदोलनाला पाठिंबा दर्शविला.
शिरोड्यातील दादागिरीला काँग्रेस भीक घालणार नाही : गिरीश चोडणकर
गोवा प्रदेश काँग्रेस कमिटीचे अध्यक्ष गिरीश चोडणकर यांनी शिरोडा मतदारसंघात राजकीय दहशत आणि दादागिरी सुरू असल्याचा गंभीर आरोप केला. काँग्रेसने लावलेले निषेधाचे फलक आणि पोस्टर्स फाडण्यात आल्याचा दावा त्यांनी केला.
अशा प्रकारे दडपशाही करून काँग्रेसचा आवाज दाबण्याचा प्रयत्न होत असला, तरी काँग्रेसचे कार्यकर्ते कोणत्याही धमक्यांना किंवा दादागिरीला घाबरणार नाहीत, असा इशारा चोडणकर यांनी दिला.
गोव्याच्या जनतेच्या न्याय्य हक्कांसाठी सुरू झालेली ‘गोंय राखण यात्रा’ कोणत्याही परिस्थितीत थांबणार नाही. गोव्याची भूमी, पर्यावरण आणि जनतेच्या हितासाठी काँग्रेसचा संघर्ष अधिक तीव्र केला जाईल, असे त्यांनी ठणकावून सांगितले.
गोव्याची जमीन, म्हादई आणि तरुणांचे भवितव्य धोक्यात : युरी आलेमाव
विरोधी पक्षनेते युरी आलेमाव यांनी भाजप सरकारवर जोरदार हल्लाबोल करताना शिरोडा मतदारसंघातील जनतेला भेडसावणाऱ्या विविध समस्यांकडे लक्ष वेधले.
मतदारसंघातील रस्त्यांची दुरवस्था, खेळाच्या मैदानांचा अभाव, पाणीटंचाई आणि प्रलंबित जलवाहिनी प्रकल्प यांमुळे नागरिक, विशेषतः तरुणवर्ग त्रस्त असल्याचे त्यांनी सांगितले.
भाजप सरकारच्या चुकीच्या धोरणांमुळे गोव्याचे डोंगर, शेती, नद्या आणि खाजन जमिनींचे अस्तित्व धोक्यात आले आहे. बोरी येथील खाजन जमिनींचा प्रश्न उपस्थित करताना त्यांनी गोव्याच्या नैसर्गिक संपत्तीच्या संरक्षणासाठी सरकार गंभीर नसल्याचा आरोप केला.
प्रस्तावित आयआयटी प्रकल्पाबाबत स्थानिक जनतेला विश्वासात घेण्यात आले नसल्याचा आरोपही त्यांनी केला. बोरी परिसरातील वारंवार उद्भवणारी पूरस्थिती आणि बोरी पुलाच्या प्रकल्पाच्या खर्चात होत असलेली वाढ यावरूनही त्यांनी सरकारला धारेवर धरले.
म्हादई नदीच्या प्रश्नावर बोलताना आलेमाव म्हणाले की, म्हादईचे पाणी वळविण्यात आल्यास संपूर्ण गोव्याला, विशेषतः शिरोडा परिसराला गंभीर परिणाम भोगावे लागतील. म्हादईसंदर्भातील सविस्तर प्रकल्प अहवाल (डीपीआर) मागे घेण्यात सरकारला अपयश आल्याचा आरोप त्यांनी केला.
गोव्यातील जमिनींचे संरक्षण करण्यासाठी काँग्रेस कटिबद्ध असून २०२७ मध्ये सत्तेवर आल्यानंतर कलम ३९-अ तातडीने रद्द करण्यात येईल. बेकायदेशीर जमीन रूपांतरणाला आळा घालण्यासाठी आणि गोव्याची भूमी सुरक्षित ठेवण्यासाठी काँग्रेस ठोस पावले उचलेल, अशी ग्वाही त्यांनी दिली.
गोव्यात नवीन उद्योगधंदे आणि रोजगाराच्या संधी निर्माण होत नसल्याने स्थानिक तरुणांना रोजगारासाठी राज्याबाहेर आणि परदेशात स्थलांतर करावे लागत असल्याची खंत त्यांनी व्यक्त केली. काँग्रेस सत्तेवर आल्यानंतर गोमंतकीयांना नोकऱ्यांमध्ये ८० टक्के आरक्षण देण्याच्या आश्वासनाचा त्यांनी पुनरुच्चार केला.
शिरोडा हा पारंपरिक काँग्रेसचा बालेकिल्ला असून २०२७ च्या विधानसभा निवडणुकीत हा मतदारसंघ पुन्हा काँग्रेसच्या ताब्यात आणण्यासाठी पक्ष पूर्ण ताकदीने प्रयत्न करेल, असा विश्वास आलेमाव यांनी व्यक्त केला.
राहुल गांधींच्या नेतृत्वाखाली गोव्यात काँग्रेसची लाट : विश्वजीत कदम
महाराष्ट्रातील काँग्रेसचे आमदार विश्वजीत कदम यांनी ‘गोंय राखण यात्रे’ला मिळणाऱ्या जनतेच्या उत्स्फूर्त प्रतिसादाचे कौतुक केले.
लोकसभेतील विरोधी पक्षनेते राहुल गांधी यांच्या नेतृत्वाखाली देशभरात काँग्रेसला बळ मिळत असून गोव्यातही काँग्रेसची लाट स्पष्टपणे दिसत असल्याचे त्यांनी सांगितले.
यात्रेदरम्यान नागरिकांशी झालेल्या संवादातून भाजप सरकारविरोधात जनतेमध्ये तीव्र नाराजी आणि असंतोष असल्याचे जाणवल्याचे कदम म्हणाले.
गोव्यातील बिघडलेली कायदा व सुव्यवस्था, अलीकडे घडलेली गोळीबाराची घटना, वाढते जमीन रूपांतरण आणि तरुणांमधील बेरोजगारी या मुद्द्यांवरून त्यांनी भाजप सरकारवर टीका केली.
राज्यातील तरुणांना रोजगाराच्या संधी उपलब्ध होत नसताना भाजप सरकार कोणत्या आर्थिक विकासाच्या गप्पा मारत आहे, असा सवाल त्यांनी उपस्थित केला.
मतदारयाद्यांच्या विशेष सखोल पुनरीक्षणाच्या (एसआयआर) प्रक्रियेविरोधात सुरू असलेल्या आंदोलनांचा उल्लेख करताना त्यांनी राम मंदिर प्रकल्पाशी संबंधित कथित भ्रष्टाचाराच्या आरोपांचाही मुद्दा उपस्थित केला.
शिरोड्यातील दहशतीचे राजकारण संपवा; जनादेशाचा विश्वासघात करणाऱ्यांना पराभूत करा : माणिकराव ठाकरे
अखिल भारतीय काँग्रेस कमिटीचे गोवा प्रभारी माणिकराव ठाकरे यांनी शिरोडा मतदारसंघात दहशतीचे वातावरण निर्माण करण्यात आल्याचा आरोप करत ते संपविण्याची गरज व्यक्त केली.
जनतेने दिलेल्या कौलाशी विश्वासघात करणाऱ्या आमदाराला आगामी विधानसभा निवडणुकीत पराभूत करण्याचे आवाहन त्यांनी मतदारांना केले.
भाजपवर निवडणूक प्रक्रियेत गैरप्रकार केल्याचा आरोप करताना ठाकरे म्हणाले की, मतदारयाद्यांमध्ये फेरफार करणे आणि राजकीय फायद्यासाठी मतदारांची नावे वगळणे, हे लोकशाहीसाठी अत्यंत घातक आहे.
लोकसभेतील विरोधी पक्षनेते राहुल गांधी यांनी ‘व्होट चोरी’चा मुद्दा देशपातळीवर उपस्थित करून नागरिकांना त्यांच्या लोकशाही आणि मतदानाच्या अधिकारांबाबत जागरूक केले आहे, असे सांगत त्यांनी राहुल गांधी यांच्या भूमिकेचे कौतुक केले.
लोकशाहीचे रक्षण करण्यासाठी आणि गोव्याला भाजपच्या कारभारातून मुक्त करण्यासाठी जनतेने काँग्रेसच्या पाठीशी खंबीरपणे उभे राहावे, असे आवाहन ठाकरे यांनी केले.
काँग्रेसच्या प्रमुख नेत्यांची यात्रेला उपस्थिती
या यात्रेत अखिल भारतीय काँग्रेस कमिटीचे गोवा प्रभारी माणिकराव ठाकरे, सहप्रभारी डॉ. अंजली निंबाळकर, गोवा प्रदेश काँग्रेस कमिटीचे अध्यक्ष गिरीश चोडणकर, विरोधी पक्षनेते युरी आलेमाव, महाराष्ट्रातील काँग्रेसचे आमदार विश्वजीत कदम, काँग्रेसचे कार्याध्यक्ष ॲड. कार्लोस आल्वारिस फेरेरा, एम. के. शेख आणि सुनील कवठणकर, प्रदेश सरचिटणीस प्रदीप नाईक, माध्यम विभागाचे अध्यक्ष अमरनाथ पणजीकर, समाजमाध्यम विभागाचे अध्यक्ष हिमांशू तिवरेकर, प्रदेश महिला काँग्रेसच्या अध्यक्षा प्रतीक्षा खलप, प्रदेश युवक काँग्रेसचे अध्यक्ष अर्चित नाईक, काँग्रेस सेवादलाचे प्रमुख राजन घाटे, जिल्हाध्यक्ष राजेश वेरेकर, गट काँग्रेसचे अध्यक्ष स्नेहाल ग्रासियस, काँग्रेस नेते शिप्रसाद शिरोडकर, हेमंत सामंत यांच्यासह पक्षाचे अन्य ज्येष्ठ नेते, पदाधिकारी आणि कार्यकर्ते मोठ्या संख्येने सहभागी झाले होते.
कार्यक्रमाचे सूत्रसंचालन गोवा प्रदेश काँग्रेस कमिटीच्या माध्यम विभागाचे अध्यक्ष अमरनाथ पणजीकर यांनी केले. सांस्कृतिक कार्यक्रमाने या कार्यक्रमाची सांगता झाली.
