गोय राखण यात्रेला म्हापशात सातव्या दिवशी प्रचंड प्रतिसाद

हजारो नागरिकांचा सहभाग; गोव्याची भूमी, अस्मिता, पर्यावरण आणि भावी पिढ्यांच्या रक्षणासाठी एकजुटीचा निर्धार

गोवा खबर: काँग्रेसच्या नेतृत्वाखाली सुरू असलेल्या ‘गोय राखण यात्रेला’ सातव्या दिवशी म्हापसा मतदारसंघात प्रचंड जनसमर्थन मिळाले. हजारो नागरिक, काँग्रेसचे नेते आणि कार्यकर्ते यात्रेत सहभागी झाले. गोव्याची भूमी, अस्मिता, संस्कृती, पर्यावरण आणि भावी पिढ्यांचे रक्षण करण्यासाठी सहभागी नागरिकांनी एकजुटीची शपथ घेतली.

उत्तर गोव्याचे प्रमुख व्यापारी केंद्र असलेल्या म्हापशात यात्रा दाखल होताच नागरिकांचा उत्स्फूर्त प्रतिसाद पाहायला मिळाला. शासनातील कारभार, बेरोजगारी, भ्रष्टाचार, कायदा-सुव्यवस्था आणि गोव्याच्या हितांकडे होत असलेले कथित दुर्लक्ष याबाबत जनतेमध्ये वाढत असलेली चिंता या सहभागातून स्पष्ट होत असल्याचे काँग्रेस नेत्यांनी सांगितले.

गोव्याचे हित आणि भविष्यातील पिढ्यांचे रक्षण करण्यासाठी एकजुटीने लढण्याचा निर्धार यावेळी नागरिकांनी व्यक्त केला. तसेच २०२७च्या विधानसभा निवडणुकीत राजकीय परिवर्तन घडवून आणण्यासाठी एकत्र येण्याचे आवाहन काँग्रेस नेत्यांनी केले.

“२७ वर्षांपासून म्हापशाचा विकास खुंटला” : युरी आलेमाव

सभेला संबोधित करताना अखिल भारतीय काँग्रेस समितीचे गोवा सहप्रभारी डॉ. अंजली निंबाळकर, गोवा प्रदेश काँग्रेस समितीचे अध्यक्ष गिरीश चोडणकर, विरोधी पक्षनेते युरी आलेमाव आणि काँग्रेसचे कार्याध्यक्ष तथा आमदार अल्टोन डिकॉस्ता यांच्यासह स्थानिक काँग्रेस नेत्यांनी विकास, रोजगार, कायदा-सुव्यवस्था, भ्रष्टाचार आणि गोव्याच्या अस्मितेच्या संरक्षणाशी संबंधित विविध प्रश्न उपस्थित केले.

विरोधी पक्षनेते युरी आलेमाव यांनी म्हापसा मतदारसंघाचे गेल्या जवळपास २७ वर्षांपासून एकाच राजकीय कुटुंबाकडून प्रतिनिधित्व होत असूनही अपेक्षित विकास झालेला नसल्याचा आरोप केला.

“गेल्या २७ वर्षांपासून योग्य विकासाअभावी म्हापशातील जनतेला त्रास सहन करावा लागत आहे. उत्तर गोव्याचे प्रमुख व्यापारी केंद्र म्हणून आधुनिक पायाभूत सुविधा आणि सक्षम नागरी सुविधा उपलब्ध होण्याऐवजी म्हापशाकडे दुर्लक्ष करण्यात आले,” असा आरोप आलेमाव यांनी केला.

गोव्यातील कायदा-सुव्यवस्थेच्या स्थितीवरही त्यांनी चिंता व्यक्त केली. हत्या, महिलांविरोधातील गुन्हे आणि अमली पदार्थांच्या वाढत्या समस्येकडे त्यांनी लक्ष वेधले आणि या प्रश्नांवर तातडीने प्रभावी उपाययोजना करण्याची गरज व्यक्त केली.

२०२७च्या विधानसभा निवडणुकीत काँग्रेसला पाठिंबा देऊन शासनात परिवर्तन घडवून आणण्यासाठी म्हापशातील जनतेने पुढे यावे, असे आवाहन आलेमाव यांनी केले.

“गोव्याच्या रक्षणासाठी गोमंतकीय एकत्र येत आहेत” : गिरीश चोडणकर

गोवा प्रदेश काँग्रेस समितीचे अध्यक्ष गिरीश चोडणकर यांनी ‘गोय राखण यात्रेला’ मिळत असलेला प्रचंड प्रतिसाद हा गोमंतकीय जनता आपल्या भूमी, अस्मिता, संस्कृती आणि पर्यावरणाच्या रक्षणासाठी एकत्र येत असल्याचे द्योतक असल्याचे सांगितले.

सरकारी नोकरभरती आणि रोजगाराच्या प्रश्नावरून त्यांनी भाजप सरकारवर टीका केली. सरकारी नोकरभरतीची प्रक्रिया “गोंधळाची” झाली असून रोजगाराच्या नावाखाली बेरोजगार गोमंतकीय तरुणांची दिशाभूल केली जात असल्याचा आरोप त्यांनी केला.

“गोय राखण यात्रेदरम्यान दिसून येत असलेली एकजूट हा एक ठोस राजकीय संदेश आहे. गोमंतकीय जनता आपल्या भूमीचे, आपल्या अस्मितेचे आणि भावी पिढ्यांचे भविष्य सुरक्षित करण्यासाठी एकत्र येत आहे,” असे चोडणकर म्हणाले.

२०२७च्या विधानसभा निवडणुकीत म्हापशातील जनतेने काँग्रेसला पाठिंबा द्यावा, असे आवाहन त्यांनी केले.

गोव्याच्या कानाकोपऱ्यात ‘गोय राखण यात्रा’ सुरूच राहणार

काँग्रेसचे कार्याध्यक्ष अल्टोन डिकॉस्ता तसेच इतर स्थानिक काँग्रेस नेत्यांनी यावेळी उपस्थितांना संबोधित केले. मोठ्या संख्येने यात्रेत सहभागी झाल्याबद्दल त्यांनी म्हापशातील नागरिकांचे आभार मानले.

‘गोय राखण यात्रा’ गोव्याच्या विविध भागांत पुढेही सुरू राहणार असून, शासन, रोजगार, भ्रष्टाचार, जमीन, पर्यावरण, पायाभूत सुविधा आणि गोव्याच्या अस्मितेशी संबंधित स्थानिक प्रश्न मांडण्यासाठी नागरिकांना व्यासपीठ उपलब्ध करून देण्यात येईल, असे काँग्रेस नेत्यांनी सांगितले.

गोव्याचे हित आणि गोमंतकीय जनतेचे प्रश्न राजकीय चर्चेच्या केंद्रस्थानी आणण्यासाठी तसेच गोव्याच्या हक्कांच्या रक्षणासाठी एक व्यापक जनआंदोलन उभे करण्याचा यात्रेचा उद्देश असल्याचे काँग्रेस नेत्यांनी स्पष्ट केले.

यावेळी अ. भा. काँग्रेस समितीचे गोवा प्रभारी माणिकराव ठाकरे, सहप्रभारी डॉ. अंजली निंबाळकर, गोवा प्रदेश काँग्रेस समितीचे अध्यक्ष गिरीश चोडणकर, विरोधी पक्षनेते युरी आलेमाव, कार्याध्यक्ष अल्टोन डिकॉस्ता व सुनील कवठणकर, उपाध्यक्ष प्रमोद साळगावकर, ज्येष्ठ नेते गुरुदास नाटेकर, शशिकांत कांदोळकर व सुभाष नार्वेकर, मीडिया विभागाचे अध्यक्ष अमरनाथ पणजीकर, सोशल मीडिया विभागाचे अध्यक्ष हिमांशू तिवरेकर, जिल्हाध्यक्ष शशांक नार्वेकर व मंगलदास नाईक, सेवादल प्रमुख राजन घाटे, युवक काँग्रेस अध्यक्ष अर्चित नाईक, महिला काँग्रेस अध्यक्षा प्रतीक्षा खलप, सरचिटणीस विजय भिके, संजय बर्डे, सुधीर कांदोळकर, राहुल म्हांबरे, सलमान खान यांच्यासह काँग्रेसचे अन्य नेते, पदाधिकारी, कार्यकर्ते आणि हजारो यात्रेकरू उपस्थित होते.