चोडणकर-पाटकर नेतृत्व वादाची पुन्हा चर्चा; पक्षांतर्गत संघर्ष चव्हाट्यावर

खर्गेंच्या गोवा दौऱ्यापूर्वी काँग्रेसला धक्का; 108 बूथ लेव्हल एजंटांचे राजीनामे

गोवा खबर : काँग्रेसचे राष्ट्रीय अध्यक्ष मल्लिकार्जुन खर्गे यांच्या गोवा दौऱ्याच्या पूर्वसंध्येला प्रदेश काँग्रेसला मोठा संघटनात्मक धक्का बसला आहे. काँग्रेसच्या 108 बूथ लेव्हल एजंटांनी (BLA) राजीनामे दिल्याचे समोर आले असून, प्रदेशाध्यक्ष गिरीश चोडणकर आणि माजी प्रदेशाध्यक्ष अमित पाटकर यांच्या नेतृत्वातील वादातून ही परिस्थिती निर्माण झाल्याची चर्चा पक्षांतर्गत सुरू आहे.

2022 च्या विधानसभा निवडणुकीतील पराभवानंतर गिरीश चोडणकर यांनी प्रदेशाध्यक्षपदाचा राजीनामा दिला होता. त्यानंतर अमित पाटकर यांच्याकडे प्रदेश काँग्रेसची सूत्रे देण्यात आली होती. मात्र, प्रदेशाध्यक्ष बदलाच्या प्रक्रियेवरून काही पदाधिकाऱ्यांमध्ये नाराजी होती.

अखिल भारतीय काँग्रेस समितीचे सरचिटणीस के. सी. वेणुगोपाल यांनी त्यावेळी गोव्यात येऊन नाराज नेत्यांशी स्वतंत्र चर्चा केली होती. त्यानंतर चोडणकर यांच्या नियुक्तीला समर्थन मिळाल्याचे चित्र निर्माण झाले होते. मात्र आता 108 बूथ लेव्हल एजंटांच्या राजीनाम्याचा दावा समोर आल्याने पक्षातील मतभेद पुन्हा गंभीर झाल्याची चर्चा सुरू झाली आहे.

खर्गेंच्या दौऱ्याआधीच राजीनाम्यांचा दावा

काँग्रेसचे राष्ट्रीय अध्यक्ष मल्लिकार्जुन खर्गे गोवा दौऱ्यावर येत असतानाच ही घडामोड समोर आल्याने तिचे राजकीय महत्त्व वाढले आहे. राष्ट्रीय नेतृत्वाच्या उपस्थितीत पक्ष संघटना मजबूत करण्याचे प्रयत्न सुरू असताना बूथ पातळीवरील कार्यकर्त्यांनी राजीनामे देणे काँग्रेससाठी चिंतेचा विषय ठरू शकतो.

वृत्तानुसार, राजीनामा देणाऱ्यांपैकी बूथ लेव्हल एजंट अ‍ॅश्ली पिंटो यांनी खर्गे यांच्या गोवा दौऱ्याबाबत आपल्याला पूर्णपणे अंधारात ठेवण्यात आल्याचा आरोप केला आहे. पक्षातील कोणत्याही नेत्याने आपल्याला विश्वासात घेतले नाही तसेच बैठकीसाठी निमंत्रणही दिले नसल्याचे त्यांनी म्हटले आहे.

पाटकर गटाची नाराजी कायम?

प्रदेशाध्यक्ष बदलल्यानंतर काही काँग्रेस पदाधिकाऱ्यांनी आपल्या पदांचे राजीनामे दिल्याचे प्रकार यापूर्वीही घडले होते. केंद्रीय नेतृत्वाने हस्तक्षेप करून परिस्थिती नियंत्रणात आणण्याचा प्रयत्न केला होता. मात्र नेतृत्वाच्या मुद्द्यावर असलेली नाराजी पूर्णपणे संपलेली नसल्याचे सध्याच्या घडामोडीतून दिसत आहे.

एकीकडे मल्लिकार्जुन खर्गे यांच्या दौऱ्याच्या माध्यमातून काँग्रेस गोव्यातील संघटना आणि बूथ स्तरावरील यंत्रणा मजबूत करण्यावर भर देत असताना, दुसरीकडे 108 बूथ लेव्हल एजंटांच्या राजीनाम्याचा दावा समोर आल्याने प्रदेश काँग्रेसमधील अंतर्गत संघर्ष पुन्हा चर्चेच्या केंद्रस्थानी आला आहे.