डॉ. मेधा साळकर यांच्याकडे आरोग्य सेवा संचालनालयाच्या संचालकपदाचा अतिरिक्त कार्यभार

गोवा खबर : गोवा सरकारने आरोग्य विभागात महत्त्वाचा प्रशासकीय निर्णय घेत डॉ. मेधा साळकर, मुख्य वैद्यकीय अधिकारी (Chief Medical Officer), आरोग्य सेवा संचालनालय यांच्याकडे आरोग्य सेवा संचालक (Director of Health Services) पदाचा अतिरिक्त कार्यभार सोपविला आहे. हा आदेश १ ऑगस्ट २०२६ पासून लागू होणार असून तो राज्यपालांच्या नावाने जारी करण्यात आला आहे.

सध्याच्या प्रभारी आरोग्य सेवा संचालक डॉ. रूपा नाईक या सेवानिवृत्त होत असल्याने त्यांच्या निवृत्तीनंतर डॉ. मेधा साळकर या स्वतःच्या विद्यमान जबाबदाऱ्यांसह आरोग्य सेवा संचालक पदाचाही अतिरिक्त कार्यभार सांभाळणार आहेत, असे आदेशात नमूद करण्यात आले आहे.

डॉ. मेधा साळकर या सार्वजनिक आरोग्य क्षेत्रातील तीन दशकांहून अधिक अनुभव असलेल्या वरिष्ठ वैद्यकीय अधिकारी आहेत. त्यांनी १९९२ मध्ये शासकीय वैद्यकीय सेवेत प्रवेश केला असून राष्ट्रीय सार्वजनिक आरोग्य कार्यक्रम, समुदाय आरोग्य, कोविड-१९ काळातील आरोग्य व्यवस्थापन, डायलिसिस सुविधा, प्रतिबंधात्मक आरोग्य उपक्रम तसेच इंडियन मेडिकल असोसिएशन (IMA) मधील नेतृत्व अशा विविध क्षेत्रांत उल्लेखनीय योगदान दिले आहे.

राज्याच्या आरोग्य यंत्रणेसाठी हा निर्णय महत्त्वाचा मानला जात असून, डॉ. साळकर यांच्या नेतृत्वाखाली आरोग्य सेवा संचालनालयाचे कामकाज अधिक प्रभावीपणे पुढे जाईल, अशी अपेक्षा व्यक्त केली जात आहे.