गोव्यात श्री देवकी कृष्ण मंदिर, माशेल येथे पारंपरिक चिखलकालो उत्साहात साजरा

“आपण सर्वजण आपल्या मातीशी जोडलेले आहोत. अशा परंपरा साजऱ्या करून त्या पुढील पिढ्यांपर्यंत पोहोचवणे अत्यंत महत्त्वाचे आहे,” :पर्यटन मंत्री रोहन खंवटे

गोवा खबर: गोव्याच्या सर्वाधिक वैशिष्ट्यपूर्ण आणि पारंपरिक उत्सवांपैकी एक असलेला चिखलकालो उत्सव आज श्री देवकी कृष्ण मंदिर, माशेल येथे मोठ्या उत्साहात साजरा करण्यात आला. भगवान श्रीकृष्णाच्या बाललीलांवर आधारित या अनोख्या परंपरेत सहभागी होण्यासाठी हजारो भाविक आणि पर्यटकांनी उपस्थिती लावली आणि पारंपरिक चिखल खेळाचा मनमुराद आनंद लुटला.

या उत्सवात सर्व वयोगटातील नागरिकांनी उत्स्फूर्त सहभाग घेत चिखलातील पारंपरिक खेळ खेळले. भक्ती, आनंद आणि सामुदायिक ऐक्याच्या वातावरणात साजरा झालेल्या या सोहळ्याने गोव्याच्या समृद्ध सांस्कृतिक वारशाचे दर्शन घडवले. स्थानिकांसह देश-विदेशातील पर्यटकांनीही गोव्याच्या या वैशिष्ट्यपूर्ण परंपरेचा अनुभव घेतला.

गोवा सरकारचे पर्यटन मंत्री श्री. रोहन खंवटे यांनी माशेल येथे आयोजित चिखलकालो उत्सवात सहभागी होत भाविकांशी संवाद साधला तसेच पारंपरिक चिखल खेळाचा आनंद घेतला.

यावेळी बोलताना रोहन खंवटे म्हणाले, “चिखलकालोसारखे उत्सव गोव्याच्या आत्म्याचे खरे प्रतिबिंब आहेत. लोकांसोबत हा उत्सव साजरा करणे हा नेहमीच एक विशेष अनुभव असतो. ‘गोवा बियॉन्ड बीचेस’ या उपक्रमाद्वारे आम्ही गोव्याचे समुद्रकिनारेच नव्हे, तर येथील समृद्ध उत्सव, परंपरा आणि सांस्कृतिक वारसा जगासमोर आणण्याचा सातत्याने प्रयत्न करत आहोत. साहसी पर्यटन आणि पर्यावरणपूरक पर्यटनाच्या जोडीने आता आम्ही गोव्याच्या गावांवर आणि तेथील जिवंत परंपरांवर विशेष भर देत आहोत. आपण सर्वजण आपल्या मातीशी जोडलेले आहोत आणि अशा परंपरा साजऱ्या करून आपल्या पुढील पिढ्यांच्या मनात आपल्या संस्कृतीविषयी प्रेम आणि अभिमान निर्माण करणे अत्यंत आवश्यक आहे. नुकतीच सुरू केलेली ‘एकादश तीर्थ यात्रा’ ही त्याच दिशेने उचललेली आणखी एक महत्त्वपूर्ण पायरी आहे. या उपक्रमामुळे पर्यटकांना गोव्यातील प्राचीन मंदिरांचा परिचय होईल आणि स्थानिक समाजालाही नवे आर्थिक व सामाजिक संधी उपलब्ध होतील. आज लहान मुले आपल्या कुटुंबीयांसोबत उत्साहाने सहभागी होताना पाहून आनंद होत आहे. यामुळे आपल्या परंपरा, संस्कृती आणि इतिहास पुढील अनेक पिढ्यांपर्यंत जतन होणार आहे.”

चिखलकालो उत्सवाचा समारोप पारंपरिक चिखल खेळ आणि विविध धार्मिक-सांस्कृतिक उपक्रमांनी झाला. गोव्याच्या सांस्कृतिक ओळखीचे प्रतीक असलेला हा उत्सव आजही गोमंतकीय समाज मोठ्या अभिमानाने आणि उत्साहाने जपत असून, पिढ्यान्पिढ्या ही समृद्ध परंपरा पुढे नेत आहे.