युतीसंदर्भातील चर्चेसाठी आपकडून अधिकृत नेत्यांची घोषणा; गोवा वाचविण्याची लढाई एकत्रितपणे लढण्याचे आवाहन

लोकशाही, गोवा आणि संविधान वाचवू इच्छिणाऱ्या सर्व पक्षांसोबत युतीसाठी तयार

गोवा खबर : आम आदमी पार्टीचे गोवा प्रदेशाध्यक्ष वाल्मिकी नाईक, वेळीमचे आमदार क्रूझ सिल्वा, कार्याध्यक्ष गर्सन गोम्स आणि संघटन सचिव प्रशांत नाईक यांनी आज पत्रकार परिषद एक महत्त्वाचा निर्णय जाहीर केला. यावेळी त्यांनी म्हटले की, २०२७ च्या गोवा विधानसभा निवडणुकीसाठी आम आदमी पार्टी विरोधी पक्षांसोबत युती करण्यास तयार आहे. युतीसंदर्भातील चर्चेसाठी पक्षाने प्रदेशाध्यक्ष वाल्मिकी नाईक, कार्याध्यक्ष गर्सन गोम्स आणि संघटन सचिव प्रशांत नाईक यांना अधिकृत प्रतिनिधी म्हणून नियुक्त केले आहे. पक्षाच्या नेत्यांनी स्पष्ट केले की, आम आदमी पार्टीची लढाई भाजपविरोधात असून लोकशाही, संविधान आणि गोव्याचे संरक्षण करण्यासाठी ही वैचारिक लढाई सर्वांनी एकत्र येऊन लढली पाहिजे.

माध्यमांशी संवाद साधताना गोवा प्रदेशाध्यक्ष वाल्मिकी नाईक म्हणाले की, २०२७ च्या विधानसभा निवडणुकीचे राजकीय वातावरण आतापासूनच तयार होऊ लागले आहे. गोव्यातील जनता भाजप सरकारच्या कारभाराला कंटाळली असून सर्व विरोधी पक्षांनी एकत्र यावे, अशी त्यांची स्पष्ट अपेक्षा आहे.

वाल्मिकी नाईक म्हणाले की, २०२७ ची निवडणूक ही केवळ जागा जिंकण्याची निवडणूक नसून संविधानाचे संरक्षण, लोकशाहीचे रक्षण आणि गोवा वाचविण्यासाठी भाजपविरोधात लढली जाणारी वैचारिक लढाई आहे. मागील निवडणुकांमध्ये आम आदमी पार्टीला जनतेचा चांगला प्रतिसाद मिळाला असून राज्यात पक्षाने सातत्याने आपले संघटन मजबूत केले आहे. गोव्याला बहुमताचे स्थिर सरकार आवश्यक आहे. पुढील सरकारकडे किमान ३५ आमदार असावेत, जेणेकरून भाजपला आमदार फोडण्याचे किंवा सरकार अस्थिर करण्याचे कोणतेही डाव यशस्वी करता येणार नाहीत.

वाल्मिकी नाईक यांनी सर्व विरोधी पक्षांना वैयक्तिक महत्त्वाकांक्षा आणि नेतृत्वाच्या आकांक्षा बाजूला ठेवून गोव्याच्या व्यापक हितासाठी एकत्र येण्याचे आवाहन केले. गोवा वाचविणे, लोकशाहीचे संरक्षण करणे आणि भाजपचा पराभव करणे हे समान ध्येय असलेल्या सर्व समविचारी विरोधी पक्षांसोबत युती करण्यास आम आदमी पार्टी पूर्णपणे तयार असल्याचे त्यांनी सांगितले.

ते पुढे म्हणाले की, अशा युतीमुळे गोव्याला स्थिर सरकार मिळेल, पक्षांतरांना आळा बसेल, नेतृत्वावरील वाद टाळले जातील आणि सरकार आपला संपूर्ण कार्यकाळ पूर्ण करेल. तसेच भाजपने गोव्याचे केलेले नुकसान भरून काढणे, गोव्याची जमीन, ओळख, जंगले आणि पर्यावरणाचे संरक्षण करणे तसेच आम आदमी पार्टीने दिलेली मोफत वीज, दर्जेदार आरोग्यसेवा आणि उत्तम शिक्षण यांसारख्या जनहिताच्या हमींची प्रभावी अंमलबजावणी करणे हे या सरकारचे प्रमुख उद्दिष्ट असेल.

आम आदमी पार्टीचे आमदार क्रूझ सिल्वा म्हणाले की, गोव्याची जमीन, जंगले आणि नद्या सातत्याने धोक्यात असून भाजप सरकार राज्याच्या नैसर्गिक संपत्तीचे आणि अस्मितेचे संरक्षण करण्यात पूर्णपणे अपयशी ठरले आहे.

ते म्हणाले की, गोव्याचे संरक्षण करायचे असेल तर २०२७ मध्ये भाजपला पुन्हा सत्तेत येऊ देता कामा नये. गोव्याच्या भविष्यासाठी प्रामाणिकपणे काम करण्याची इच्छा असलेल्या प्रत्येकाने या वैचारिक लढाईत एकत्र सहभागी व्हावे.

क्रूझ सिल्वा यांनी सर्व विरोधी पक्ष आणि शक्तींना मोठ्या प्रमाणावर एकत्र येण्याचे आवाहन करताना सांगितले की, आगामी विधानसभा निवडणुकीत भाजपला एक अंकी जागांवर आणणे हेच ध्येय असले पाहिजे. केवळ एकजूट झालेला विरोधकच गोव्याला स्थिर, जनहितैषी आणि राज्याच्या भविष्यासाठी कटिबद्ध असे सरकार देऊ शकतो.
आम आदमी पार्टीच्या नेत्यांनी सांगितले की, पक्ष नेहमीच राजकीय स्वार्थ आणि वैयक्तिक महत्त्वाकांक्षेपेक्षा गोव्याच्या हिताला सर्वोच्च प्राधान्य देईल. लोकशाहीचे संरक्षण, गोव्याचे हित जपणे आणि जनतेच्या कल्याणासाठी स्थिर सरकार देणे हे समान उद्दिष्ट असलेल्या सर्व समविचारी पक्षांसोबत काम करण्यास पक्ष पूर्णपणे तयार आहे.