‘द वीक’ मासिकात विश्वजीत राणे यांच्या पर्यावरण संवर्धनाच्या दृष्टीकोनाची दखल

गोवा खबर : राष्ट्रीय स्तरावरील प्रतिष्ठित ‘द वीक’ या मासिकाने गोव्याचे नगर नियोजन (TCP) मंत्री विश्वजीत राणे यांच्या पर्यावरण संरक्षण आणि शाश्वत विकासाच्या दृष्टीकोनावर विशेष लेख प्रकाशित केला आहे. “The Green Guardian: Vishwajit Rane’s Vision to Protect Goa’s Ecology” या शीर्षकाखाली प्रसिद्ध झालेल्या लेखात गोव्याच्या पर्यावरण संवर्धनासाठी राबविण्यात येत असलेल्या विविध उपक्रमांची सविस्तर माहिती देण्यात आली आहे.

या लेखात राज्यातील पर्यावरणदृष्ट्या संवेदनशील क्षेत्रांचे संरक्षण, किनारी भाग, खाजन जमिनी, जैवविविधतेने समृद्ध क्षेत्रे आणि नैसर्गिक अधिवास जतन करण्यासाठी घेतलेल्या निर्णयांचा विशेष उल्लेख करण्यात आला आहे. गोव्याच्या विकास आराखड्याअंतर्गत पर्यावरणाला प्राधान्य देत घेतलेल्या उपाययोजना राज्यातील महत्त्वपूर्ण संवर्धनात्मक पावले असल्याचे लेखात नमूद करण्यात आले आहे.

तसेच, भूजल पुनर्भरण क्षेत्रे, नदी पात्रांचे संरक्षण, वनक्षेत्र संवर्धन आणि पर्यावरणीय संतुलन राखण्यासाठी करण्यात येणाऱ्या प्रयत्नांचीही दखल या लेखातून घेण्यात आली आहे. विकास आणि पर्यावरण यांच्यात समतोल साधण्याचा विश्वजीत राणे यांचा दृष्टिकोन गोव्याच्या दीर्घकालीन हितासाठी महत्त्वाचा असल्याचे मासिकाने अधोरेखित केले आहे.

लेखात पर्यावरणपूरक विकास, बांबू लागवड, नैसर्गिक संसाधनांचे संरक्षण आणि लोकसहभागातून नियोजन प्रक्रिया अधिक प्रभावी करण्याच्या उपक्रमांचाही उल्लेख करण्यात आला आहे. भविष्यातील पिढ्यांसाठी गोव्याचे नैसर्गिक वैभव जपण्याच्या उद्देशाने राबविण्यात येणाऱ्या धोरणांना या लेखातून राष्ट्रीय स्तरावर मान्यता मिळाल्याचे मानले जात आहे.

‘द वीक’सारख्या राष्ट्रीय मासिकात गोव्याच्या पर्यावरण संवर्धनाच्या प्रयत्नांची आणि विश्वजीत राणे यांच्या भूमिकेची घेतलेली दखल ही राज्यासाठी महत्त्वाची बाब मानली जात आहे.