गोवा खबर : गोवा प्रदेश काँग्रेस समितीचे अध्यक्ष गिरीश चोडणकर यांनी आज स्पष्ट केले की, पक्षांतर केलेल्या नेत्यांबाबत काँग्रेस पक्षाची भूमिका संदर्भात कोणताही संभ्रम, अफवांवर विश्वास न ठेवता दिशाभूल होऊ नये.
काँग्रेस नेते राहुल गांधी यांच्या नेतृत्वाखाली २०२२ साली घेण्यात आलेला निर्णय — जनतेच्या कौलाचा विश्वासघात करून काँग्रेस पक्ष सोडणाऱ्या व्यक्तींना काँग्रेसकडून निवडणुकीची उमेदवारी दिली जाणार नाही — हा निर्णय आजही कायम असून त्यामध्ये कोणताही बदल झालेला नाही.
“काँग्रेस पक्ष नेहमीच विचारसरणी, निष्ठा आणि पक्षनिष्ठ कार्यकर्त्यांच्या त्यागाचा सन्मान करत आला आहे. वैयक्तिक स्वार्थ आणि राजकीय सोयीसाठी पक्षाचा त्याग करणाऱ्यांना, कठीण काळात काँग्रेससोबत खंबीरपणे उभे राहिलेल्या निष्ठावान कार्यकर्त्यांच्या हक्कांवर गदा आणून पुन्हा संधी मिळेल, अशी अपेक्षा ठेवता येणार नाही,” असे गिरीश चोडणकर यांनी स्पष्ट केले.
पक्ष फोडण्याचे आणि काँग्रेस कमकुवत करण्याचे अनेक प्रयत्न झाले, तरी हजारो कार्यकर्ते, पदाधिकारी आणि समर्थक पक्षाशी एकनिष्ठ राहिले. त्यांच्या त्यागाचे, संघर्षाचे आणि निष्ठेचे काँग्रेस पक्षाला मोल असल्याचे त्यांनी अधोरेखित केले.
“भाजप सरकारच्या जनविरोधी धोरणांविरुद्ध सातत्याने लढणाऱ्या आणि काँग्रेसच्या विचारसरणीशी प्रामाणिक राहिलेल्या कार्यकर्त्यांच्या हिताचे संरक्षण करणे ही पक्षाची जबाबदारी आहे. पक्षनिष्ठा, समर्पण आणि लोकसेवेप्रती असलेली बांधिलकी हेच भविष्यातील नेतृत्व आणि उमेदवारीसाठीचे प्रमुख निकष राहतील,” असे चोडणकर म्हणाले.
गोवा प्रदेश काँग्रेस समिती तळागाळातील संघटना अधिक सक्षम करण्यावर आणि जनतेचा विश्वास संपादन केलेल्या निष्ठावान कार्यकर्त्यांच्या बळावर आगामी निवडणुकांसाठी सज्ज होण्यावर लक्ष केंद्रित करत असल्याचेही त्यांनी सांगितले.
“आमचा संदेश स्पष्ट आहे — जे काँग्रेसच्या कठीण काळात पक्षासोबत ठामपणे उभे राहिले, काँग्रेस पक्ष त्यांच्यासोबत ठामपणे उभा राहील. राहुल गांधी यांच्या नेतृत्वाखाली घेण्यात आलेल्या निर्णयात कोणताही बदल झालेला नाही आणि निष्ठा, प्रामाणिकपणा तसेच राजकीय उत्तरदायित्व या मूल्यांशी कोणतीही तडजोड केली जाणार नाही,” असे त्यांनी ठामपणे नमूद केले.
गोवा प्रदेश काँग्रेस समिती तत्त्वनिष्ठ राजकारण, संघटनात्मक बळकटी आणि समर्पित नेतृत्वाच्या माध्यमातून जनतेचा विश्वास अधिक दृढ करण्यासाठी तसेच भाजप सरकारला सक्षम व विश्वासार्ह पर्याय उभा करण्यासाठी कटिबद्ध आहे.
