गोवा खबर : गोव्यात मान्सूनचे आगमन जवळ आलेले असतानाच ‘गोवा कॅन’ आणि वन विभागाने संयुक्तपणे आपली वार्षिक ‘सेव्ह द फ्रॉग’ (बेडूक वाचवा) मोहीम पुन्हा एकदा हाती घेतली आहे. निसर्गाच्या परिसंस्थेमध्ये बेडूक हे अत्यंत महत्त्वाची भूमिका बजावतात, कारण ते डासांच्या अळ्या खाऊन त्यांची पैदास नैसर्गिकरीत्या नियंत्रणात ठेवतात. मात्र, गेल्या काही वर्षांत बेडकांच्या मोठ्या प्रमाणावर होणाऱ्या शिकारीमुळे अन्नसाखळी विस्कळीत झाली असून, परिणामी मलेरिया आणि डेंग्यूसारखे कीटकजन्य आजार राज्यात वेगाने वाढत असल्याचा गंभीर इशारा पर्यावरणवाद्यांनी दिला आहे. पर्यावरण अभ्यासक आणि गोवा कॅनचे समन्वयक रोलंड मार्टिन्स यांनी या समस्येकडे प्रशासनाचे गंभीर लक्ष वेधले आहे.
गोव्यात खाद्य शौकिनांकडून बेडकांना ‘जम्पिंग चिकन’ किंवा ‘फ्लाइंग चिकन’ म्हणून बेकायदेशीरपणे खाण्याची अनिष्ठ प्रथा वाढली आहे. या पार्श्वभूमीवर वन अधिकाऱ्यांनी हॉटेल आणि खानावळींवर कडक देखरेख ठेवण्यासाठी विशेष गस्त सुरू केली आहे. गोव्यातील ‘इंडियन बुलफ्रॉग’ आणि ‘जर्डन्स बुलफ्रॉग’ या प्रजातींना वन्यजीव (संरक्षण) कायदा, १९७२ अंतर्गत कायदेशीर संरक्षण लाभलेले आहे. त्यामुळे बेडकांची शिकार करणे, वाहतूक करणे किंवा त्यांचे मांस विकणे व खाणे हा गंभीर गुन्हा असून, असे करताना आढळल्यास दोषींना ३ वर्षांपर्यंतचा तुरुंगवास आणि २५ हजार रुपयांपर्यंतच्या दंडाची तरतूद कायद्यात करण्यात आली आहे. नागरिकांनी आपल्या परिसरात बेडकांचे रक्षण करावे आणि अवैध शिकारीची माहिती तातडीने वन विभागाला द्यावी, असे आवाहन करण्यात आले आहे.
