गोवा खबर : राज्यपाल पुसापती अशोक गजपती राजू आणि मुख्यमंत्री डॉ. प्रमोद सावंत यांनी समस्त गोमंतकीयांना गोवा घटक राज्य दिनाच्या पूर्वसंध्येला हार्दिक शुभेच्छा दिल्या आहेत. ३० मे १९८७ रोजी गोव्याला स्वतंत्र घटक राज्याचा दर्जा मिळाला आणि गोवा हे भारतीय संघराज्याचे २५ वे अधिकृत राज्य बनले होते. या ऐतिहासिक घटनेला उजाळा देत राज्यपाल आणि मुख्यमंत्र्यांनी राज्यातील तसेच जगभरातील प्रत्येक गोमंतकीयाला आपला संदेश पाठवला आहे.
राज्यपाल आपल्या शुभेच्छा संदेशात म्हणाले की, हा दिवस केवळ एक घटनात्मक ऐतिहासिक प्रसंग नसून गोव्यातील लोकांची भावना, ओळख आणि त्यांच्या आशा-आकांक्षांचे प्रतीक आहे. गोव्याने प्रगती आणि आधुनिकतेचा स्वीकार करतानाच आपला अद्वितीय सांस्कृतिक आत्मा आणि वारसा यशस्वीपणे जपला आहे. गोवा हे केवळ एक सुंदर पर्यटन स्थळ नसून ते सामाजिक सलोखा, शांतता आणि साक्षरतेचे एक जिवंत उदाहरण आहे. बदलत्या जागतिक परिस्थितीत गोव्यातील तरुणांना दर्जेदार शिक्षण आणि कौशल्ये देऊन सक्षम करणे गरजेचे आहे, जेणेकरून त्यांची स्वप्ने मायभूमीतच साकार होतील. राज्याचा विकास करताना आपल्या नद्या, जंगले, समुद्रकिनारे आणि सामाजिक मूल्यांचे जतन करून पर्यावरणाभिमुख आर्थिक प्रगती साधणे हेच खऱ्या अर्थाने प्रगतीशील पाऊल असेल, असे सांगत त्यांनी शेतकरी, मच्छीमार, उद्योजक, कलाकार आणि कामगारांच्या योगदानाचा गौरव केला.
मुख्यमंत्री डॉ. प्रमोद सावंत यांनी आपल्या संदेशात म्हटले की, घटक राज्याचा दर्जा हा अनेक स्वातंत्र्यसैनिक आणि नागरिकांच्या अविरत प्रयत्नांचे व त्यागाचे फळ आहे. प्रधानमंत्री नरेंद्र मोदी यांच्या ‘विकसित भारत २०४७’ या संकल्पनेला बळ देण्यासाठी गोवा सरकार सुशासन, शाश्वत विकास, महिला सक्षमीकरण आणि युवा सहभागावर विशेष भर देत आहे. गेल्या काही वर्षांत गोव्याने शिक्षण, आरोग्य, पायाभूत सुविधा आणि तंत्रज्ञान क्षेत्रात उल्लेखनीय प्रगती केली असून सरकार ‘स्वयंपूर्ण गोवा’ घडवण्यासाठी कटिबद्ध आहे. या यशाचे खरे श्रेय राज्यातील नारी शक्ती, युवा शक्ती आणि किसान शक्तीला जाते, असे नमूद करत मुख्यमंत्र्यांनी सर्वांना गोव्याची ओळख व पर्यावरण जतन करण्यासाठी एकत्रितपणे काम करण्याचे आवाहन केले आहे.
