गोवा खबर: वाळपई येथील सामुदायिक आरोग्य केंद्रातील वैद्यकीय निष्काळजीपणाच्या प्रकरणात सरकारने मोठी कारवाई करत डॉ. यवंती गावडे यांना अनिश्चित काळासाठी निलंबित केले आहे. सार्वजनिक आरोग्य विभागाने याबाबत आदेश जारी केला आहे
सरकारच्या प्राथमिक चौकशी अहवालानुसार, गौरव सावर्डेकर या ११ वर्षीय मुलाला २७ एप्रिल रोजी पायाला दुखापत झाल्यानंतर वाळपई सीएचसीमध्ये दाखल करण्यात आले होते. एक्स-रेमध्ये डाव्या पायाच्या फिबुला हाडाला फ्रॅक्चर असल्याचे निदर्शनास आले. त्यानंतर प्राथमिक उपचार म्हणून प्लास्टर स्लॅब लावण्याचा सल्ला देण्यात आला.
अहवालात नमूद करण्यात आले आहे की, संबंधित प्लास्टर प्रक्रिया ऑर्थोपेडिक सहाय्यक म्हणून काम करणाऱ्या एमटीएस कर्मचाऱ्याकडून करण्यात आली होती. उपचारानंतर दुसऱ्या दिवशी मुलाला ताप, उलट्या आणि झोप येणे अशी लक्षणे दिसू लागल्याने त्याला पुन्हा सीएचसीमध्ये आणण्यात आले. त्यानंतर पुढील उपचारासाठी गोवा मेडिकल कॉलेजमध्ये रेफर करण्यात आले.
जीएमसीमधील डॉक्टरांकडून मिळालेल्या माहितीनुसार, मुलाच्या पायाच्या बोटांना सूज येऊन गँग्रीन झाल्यामुळे अखेरीस प्रभावित पाय कापावा लागला.
अंतर्गत समितीच्या चौकशीत उपचार प्रक्रियेदरम्यान पुरेशी वैद्यकीय देखरेख नव्हती तसेच तातडीने ऑर्थोपेडिक सल्ला किंवा रेफरल देण्यात आले नाही, असे निरीक्षण नोंदवण्यात आले. या निष्कर्षांच्या आधारे डॉ. यवंती गावडे यांच्यावर वैद्यकीय निष्काळजीपणाचा ठपका ठेवण्यात आला आहे.
तपास पूर्ण होईपर्यंत डॉ. गावडे यांना तत्काळ प्रभावाने सेवेतून निलंबित करण्यात आले असून या काळात त्यांना कोणतेही वेतन किंवा भत्ते मिळणार नसल्याचे आदेशात स्पष्ट करण्यात आले आहे.
