गोवा खबर : गोव्यातील नागरिकांना सुरक्षित आणि स्वच्छ अन्न मिळावे, हा शासनाचा प्राधान्यक्रम असल्याचे स्पष्ट करत आरोग्यमंत्री विश्वजीत राणे यांनी अन्नसुरक्षेच्या नियमांचे उल्लंघन करणाऱ्यांवर कठोर कारवाईचा इशारा दिला आहे.
आज पहाटे पणजी आणि बार्देश परिसरात करण्यात आलेल्या तपासणी मोहिमेत बेटीम येथे पर्यटन बोटींशी संबंधित बेकायदेशीर केटरिंग व्यवसाय उघडकीस आला. तपासणीदरम्यान पाच पुरवठादारांकडून FSSAI परवाना नसताना आणि अत्यंत अस्वच्छ परिस्थितीत अन्न तयार केले जात असल्याचे आढळले. संबंधितांना तात्काळ कामकाज बंद करण्याचे आदेश देण्यात आले.
तसेच बागा येथेही कारवाई करण्यात आली. वारंवार नियमांचे उल्लंघन करणाऱ्या दोन बिर्याणी पुरवठादारांवर ₹२५,००० दंड ठोठावण्यात आला, तर परवाना नसलेल्या एका किरकोळ दुकानावर ₹१०,००० दंडाची कारवाई करण्यात आली.
याशिवाय, परवाना नसलेले स्नॅक पुरवठादार, घरगुती केटरर्स आणि बेकरी व्यवसाय करणाऱ्यांवर लवकरच विशेष अंमलबजावणी मोहीम राबविण्यात येणार असल्याचे राणे यांनी सांगितले.
“गोव्यातील जनतेच्या आरोग्याशी तडजोड केली जाणार नाही. नियमांचे पालन न करणाऱ्यांवर कठोर कारवाई सुरूच राहील,” असा स्पष्ट इशाराही त्यांनी दिला.
