गोवा खबर : अर्पोरा येथील ‘बर्च बाय रोमिओ लेन’ (Birch by Romeo Lane) नाईट क्लबला लागलेल्या भीषण आग प्रकरणात मुख्य संशयित असलेले गौरव आणि सौरव लुथ्रा या दोन्ही भावांना न्यायालयाने अखेर सशर्त जामीन मंजूर केला आहे. ६ डिसेंबर २०२५ रोजी घडलेल्या या दुर्घटनेत २५ जणांचा होरपळून मृत्यू झाला होता.
लुथ्रा बंधूंचे वकील पराग राव यांनी या वृत्ताला दुजोरा दिला आहे. न्यायालयाने ५० हजार रुपयांच्या जातमुचलक्यावर आणि तितक्याच रकमेच्या हमीदारावर (Surety) हा जामीन मंजूर केला आहे. “न्यायालयाने निकाल सुनावला असून हा जामीन नेहमीच्या अटींसह देण्यात आला आहे. निकालाची प्रत अद्याप मिळालेली नाही,” असे ॲड. राव यांनी आज, १ एप्रिल रोजी प्रसारमाध्यमांशी बोलताना सांगितले.
बनावट ‘ना हरकत’ (NOC) प्रमाणपत्र प्रकरण
मुख्य आग प्रकरणात जामीन मिळाला असला तरी, लुथ्रा बंधूंचा पोलीस कोठडीतील मुक्काम अद्याप संपलेला नाही. बनावट एनओसी (NOC) सादर करून क्लब चालवल्याच्या फसवणुकीच्या गुन्ह्यात दोघेही सध्या म्हापसा पोलिसांच्या कोठडीत आहेत. ३० मार्च रोजी म्हापसा न्यायालयाने त्यांना पाच दिवसांची पोलीस कोठडी सुनावली होती. या प्रकरणात संरक्षण पक्षाने अटकपूर्व जामीन न मागता नियमित जामिनासाठी अर्ज केला असल्याचेही त्यांच्या वकिलांनी स्पष्ट केले.
घटनेची पार्श्वभूमी
६ डिसेंबर २०२५: अर्पोरा येथील बर्च नाईट क्लबला भीषण आग लागली, ज्यात २५ जणांचा मृत्यू झाला.
१६ डिसेंबर २०२५: घटनेनंतर परदेशात पळून गेलेल्या लुथ्रा बंधूंना थायलंडमधून हद्दपार केल्यानंतर दिल्ली विमानतळावर गोवा पोलिसांनी अटक केली.
आरोप: त्यांच्यावर सदोष मनुष्यवध आणि सरकारी कागदपत्रांमध्ये फेरफार केल्याचे गंभीर आरोप आहेत.
तपास: पोलिसांनी या प्रकरणात ४००० पानांचे दोषारोपपत्र (Chargesheet) न्यायालयात दाखल केले आहे. सध्या हे दोन्ही भाऊ म्हापसा पोलिसांच्या ताब्यात असून, बनावट कागदपत्रांच्या संदर्भात पुढील तपास सुरू आहे.
