गोवा खबर : गोवा राज्यात गेल्या काही दिवसांपासून तापमानात मोठी वाढ होत असून, उष्णतेच्या लाटेची (Heat Wave) शक्यता निर्माण झाली आहे. या पार्श्वभूमीवर नागरिकांचे आरोग्य सुरक्षित राहण्यासाठी दक्षिण गोवा जिल्हाधिकारी कार्यालयाने विशेष आरोग्य सल्ला (Advisory) जारी केला आहे. विशेषतः दुपारी १२ ते ३ या वेळेत नागरिकांनी खबरदारी घेण्याचे आवाहन करण्यात आले आहे.
काय करावे? (सुरक्षिततेसाठी उपाय)
- पुरेसे पाणी प्या: तहान लागलेली नसली तरीही दिवसातून वारंवार पाणी आणि घरगुती पेये (ओआरएस, लिंबू पाणी, ताक, नारळ पाणी, लस्सी) प्यावे.
- पोशाख: बाहेर जाताना हलके, फिकट रंगाचे आणि सैल सुती कपडे वापरावेत. डोळ्यांच्या संरक्षणासाठी गॉगल आणि उन्हापासून वाचण्यासाठी छत्री किंवा टोपीचा वापर करा.
- घर थंड ठेवा: दिवसा घराचे पडदे आणि शटर बंद ठेवावेत, तर रात्री हवा खेळती राहण्यासाठी खिडक्या उघड्या ठेवाव्यात.
- कामाचे नियोजन: कष्टाची कामे दिवसाच्या थंड वेळेत (सकाळी किंवा संध्याकाळी) उरकावीत. बाहेर काम करणाऱ्यांनी डोके, मान आणि हातापायावर ओला कपडा ठेवावा.
काय टाळावे? (खबरदारीचे उपाय)
- वेळेचे भान: दुपारच्या कडक उन्हात, विशेषतः दुपारी १२ ते ३ या काळात घराबाहेर पडणे टाळावे.
- खाद्यपेय पथ्य: चहा, कॉफी, मद्य आणि कार्बनयुक्त शीतपेये टाळावीत कारण यामुळे शरीरातील पाणी कमी होते. तसेच उच्च प्रथिनयुक्त आणि शिळे अन्न खाणे टाळावे.
- बंद वाहने: पार्क केलेल्या वाहनांमध्ये लहान मुले किंवा पाळीव प्राण्यांना कधीही एकटे सोडू नका.
- कठोर व्यायाम: तापमान जास्त असताना कष्टाची किंवा व्यायामाची कामे करणे टाळावे.
प्राणी आणि पक्ष्यांची काळजी घ्या
जिल्हा प्रशासनाने मुक्या प्राण्यांबाबतही संवेदनशीलता दाखवण्याचे आवाहन केले आहे. पाळीव प्राण्यांना सावलीत बांधावे आणि त्यांना पुरेसे पाणी द्यावे. तसेच पक्ष्यांसाठी बाल्कनी किंवा छतावर पाण्याचे छोटे बाऊल ठेवावेत.
महत्त्वाचा इशारा : जर तुम्हाला चक्कर येत असेल किंवा प्रकृती अस्वस्थ वाटत असेल, तर घरगुती उपाय करण्याऐवजी त्वरित जवळच्या डॉक्टरांचा सल्ला घ्यावा. गर्भवती महिला आणि वृद्धांची या काळात विशेष काळजी घेणे आवश्यक आहे.
