गोवा खबर : गोव्याच्या राज्याला प्रगतीच्या मार्गावर नेणारा ‘लोकाभिमुख’ अर्थसंकल्प मांडल्याबद्दल आमदार दिव्या राणे यांनी मुख्यमंत्री डॉ. प्रमोद सावंत यांचे अभिनंदन केले आहे. विधानसभेत अर्थसंकल्पावर झालेल्या चर्चेदरम्यान बोलताना त्यांनी सरकारचे कौतुक केले.
दिव्या राणे म्हणाल्या की, या अर्थसंकल्पातून सरकारचा राज्याच्या विकासाबाबतचा स्पष्ट दृष्टिकोन दिसून येतो. त्यांनी नमूद केले की, पायाभूत सुविधा, जनकल्याणकारी योजना आणि मतदारसंघ स्तरावरील विकास कामांना या अर्थसंकल्पात विशेष प्राधान्य देण्यात आले आहे. रस्ते आणि पूल यांसारख्या पायाभूत सुविधांसाठी केलेल्या तरतुदींमुळे राज्याच्या कनेक्टिव्हिटीला बळकटी मिळेल, तसेच यामुळे आर्थिक विकासाला नवी गती प्राप्त होईल.
केवळ भौतिक विकासच नव्हे, तर आरोग्य, शिक्षण आणि सामाजिक क्षेत्रातील योजनांवरही सरकारने आपले लक्ष केंद्रित केले आहे. या तरतुदींमुळे सामान्य नागरिकांच्या जीवनमानात सुधारणा होईल आणि त्यांना दर्जेदार सुविधा उपलब्ध होतील, असा विश्वासही त्यांनी व्यक्त केला. या अर्थसंकल्पात रोजगाराच्या संधी निर्माण करण्यावर आणि गुंतवणुकीला चालना देण्यावर भर देण्यात आल्यामुळे गोव्याची अर्थव्यवस्था अधिक सक्षम होईल, असे मत त्यांनी मांडले.
