गोवा खबर : गोवा फूड अॅण्ड कल्चरल फेस्टिव्हल २०२६ हा गोव्याच्या समृद्ध खाद्यसंस्कृती आणि सांस्कृतिक वारशाचा उत्सव साजरा करण्यासाठी सज्ज झाला आहे. तीन दिवस चालणारा हा भव्य महोत्सव अस्सल गोवन जेवण, रंगतदार सांस्कृतिक कार्यक्रम आणि गोव्याची खास जीवनशैली एकाच ठिकाणी अनुभवण्याची संधी देणार आहे.
हा महोत्सव मडगाव क्रिकेट क्लब, डॉ. राजेंद्र प्रसाद स्टेडियम येथे २३ ते २५ जानेवारी दरम्यान दररोज सायंकाळी ६.३० वाजल्यापासून आयोजित करण्यात आला आहे.
महोत्सवातील सांस्कृतिक कार्यक्रमांमध्ये पहिल्या दिवशी कांत गवडे पथकाचे पारंपरिक गोवन नृत्य सादर होणार असून त्यानंतर अॅन्सन, चेल्सी आणि जेलिस्का ट्रायो, सोनिया शिरसाट त्यांच्या बँडसह आणि लिंक्स यांचे सादरीकरण होईल. दुसऱ्या दिवशी रेड स्क्वेअर बँड, अल्टीट्यूड, अक्षय नाईक, गौतमी हेदे बांबोळकर, विभा अळगुंडगी, विष्णू शिरोडकर आणि समृद्ध चोडणकर यांचे कार्यक्रम सादर होतील. शेवटच्या दिवशी टॉकिंग ड्रम्स (कार्लोस आणि टीम), हेमा सरदेसाई अॅण्ड द रायझिंग, गोवन मॅजिक डान्स ट्रूप आणि अल्कात्राझ यांचे सादरीकरण होणार आहे.
महोत्सवाबाबत बोलताना पर्यटन मंत्री रोहन खंवटे म्हणाले, “गोव्याची खाद्यसंस्कृती ही इथल्या लोकांचे जीवन, इतिहास आणि परंपरांचे प्रतिबिंब आहे. परंपरा आणि नवकल्पनांचा सुंदर संगम म्हणजेच गोव्याचे वैशिष्ट्य. स्थानिक साहित्य, पिढ्यान्पिढ्या चालत आलेल्या पाककृती आणि आधुनिक चवी यांचा समतोल या महोत्सवात पाहायला मिळतो. फूड अॅण्ड कल्चरल फेस्टिव्हल २०२६ हा स्थानिक कलाकार, पारंपरिक व्यावसायिक आणि संस्कृतीचे संवर्धक यांना एकत्र आणणारा मंच आहे.”
पर्यटन संचालक केदार नाईक म्हणाले, “हा महोत्सव केवळ उत्सव नसून एक संपूर्ण सांस्कृतिक अनुभव देण्यासाठी साकारण्यात आला आहे. अन्न, संगीत आणि पारंपरिक कला एकत्र आणून, समुदाय-केंद्रित पद्धतीने गोव्याच्या सांस्कृतिक पर्यटनाला अधिक बळ देण्याचा आमचा प्रयत्न आहे.”
संगीत आणि नृत्याबरोबरच या महोत्सवात गोवन खाद्यपदार्थ, स्थानिक हस्तकला, पारंपरिक मिठाया आणि हाताने बनवलेल्या वस्तूंचे अनेक स्टॉल्स असतील. यामुळे स्थानिक कारागीर आणि उद्योजकांना आपली कला सादर करण्याची संधी मिळेल तसेच पर्यटकांना गोव्याची खरी चव आणि संस्कृती अनुभवता येईल.
हा महोत्सव पर्यटन विभागाच्या “गोवा बियॉन्ड बिचीस” या उपक्रमाचा भाग असून, पर्यटकांना गोव्याची वारसा स्थळे, आध्यात्मिक परिक्रमा, ग्रामीण भाग, निसर्ग पर्यटन आणि समुदाय-आधारित अनुभव शोधण्यासाठी प्रोत्साहित करतो.
