गोवा खबर
परशुराम गोमंतक सेनेतर्फे चौथ्या घराचे हस्तांतरण
स्वातंत्र्यसैनिक नागेश च्यारी यांच्या कुटुंबीयांना घर अर्पण
गोवा खबर: श्री परशुराम गोमंतक सेना प्रणीत गोमंतक निवास निर्माण या सामाजिक उपक्रमांतर्गत बांधण्यात आलेल्या चौथ्या घराचे केरी (फोंडा) येथील स्वातंत्र्यसैनिक नागेशबाब च्यारी यांच्या कुटुंबीयांना अर्पण करण्याचा कार्यक्रम नुकताच पार पडला.
गोव्यातील गरीब, गरजू आणि गृहहीन गोवेकरांना स्वतःचे घर मिळावे या उद्देशाने परशुराम गोमंतक सेनेचे अध्यक्ष श्री. शैलेंद्र वेलिंगकर आणि त्यांच्या सहकाऱ्यांनी काही वर्षांपूर्वी हा उपक्रम सुरू केला होता. या उपक्रमाचा पुढचा टप्पा म्हणून चौथ्या घराचे हस्तांतरण करण्यात आले.
हस्तांतरण कार्यक्रमावेळी बोलताना वेलिंगकर म्हणाले, “गरजूंना घरे बांधून देण्याचा हा उपक्रम म्हणजे उपकार नव्हे, तर आपण ज्या समाजात राहतो त्या समाजाचे ऋण फेडण्याचा प्रयत्न आहे. प्रत्येकाने आपल्या समाजाबद्दल जबाबदारीची जाणीव ठेवून अशा कार्यात सहभागी व्हावे. हे कार्य आम्ही सेवा म्हणून करीत आहोत, आणि पुढेही अशा अनेक घरांची उभारणी करण्याचा आमचा संकल्प आहे.”
या प्रसंगी शैलेंद्र वेलिंगकर यांच्यासोबत त्यांचे सहकारी, स्थानिक पंच कंचन केरकर, च्यारी कुटुंबीय आणि ग्रामस्थ उपस्थित होते. घर हस्तांतरित होताच च्यारी कुटुंबीयांच्या चेहऱ्यावर आनंद झळकला.
स्थानिकांनी या उपक्रमाचे कौतुक करताना सांगितले की, समाजातील गरजू घटकांसाठी असे कार्य प्रेरणादायी आहे. परशुराम गोमंतक सेनेने केलेली ही मदत अनेक कुटुंबांसाठी आशेचा किरण ठरत असून, या उपक्रमातून सामाजिक ऐक्य आणि सहकार्याची भावना अधिक दृढ होत आहे.
गोमंतक निवास निर्माण योजनेअंतर्गत आतापर्यंत चार घरे बांधली गेली असून, येत्या काळात आणखी काही घरांचे बांधकाम हाती घेतले जाणार आहे.