*गोवा सरकारच्या मोफत लॅपटॉप वितरण योजनेद्वारे गोव्यात अनुसूचित जमाती (एसटी) आणि अनुसूचित जाती (एससी) समुदायातील २३२ गुणवंत विद्यार्थी सक्षम*
गोवा खबर: गोव्यातील अनुसूचित जाती (एससी) आणि अनुसूचित जमाती (एसटी) समुदायातील २३२ गुणवंत विद्यार्थ्यांना गोवा सरकारच्या माहिती तंत्रज्ञान, इलेक्ट्रॉनिक्स आणि कम्युनिकेशन्स खात्याच्या (डीआयटीई अँड सी), २०२३-२४ आणि २०२४-२५ शैक्षणिक वर्षांसाठी मोफत लॅपटॉप वितरण योजनेअंतर्गत लॅपटॉप वितरित करण्यात आले आहेत. यामध्ये २०२३-२४ शैक्षणिक वर्षातील १२१ लाभार्थी आणि २०२४-२५ शैक्षणिक वर्षातील १११ लाभार्थींचा समावेश आहे.
इन्फो टेक कॉर्पोरेशन ऑफ गोवा लिमिटेडद्वारे (आयटीजी) राबविण्यात येणाऱ्या डीआयटीई अँड सीच्या उपक्रमाचे उद्दिष्ट शैक्षणिक उत्कृष्टतेला मान्यता देणे आणि त्याचबरोबर अनुसूचित जाती/जमाती समुदायातील विद्यार्थ्यांना डिजिटल शिक्षणात समान संधी मिळणे आहे. लॅपटॉपची सुविधा देऊन, ही योजना विद्यार्थ्यांना उच्च शिक्षण घेण्यास, डिजिटल कौशल्ये विकसित करण्यास आणि भविष्यातील करिअरची तयारी करण्यास मदत करते.
गोव्याचे मुख्यमंत्री डॉ. प्रमोद सावंत यांच्या दूरदर्शी नेतृत्वाखाली, पणजीतील ईएसजी येथे माहिती तंत्रज्ञान, इलेक्ट्रॉनिक्स आणि कम्युनिकेशन्स मंत्री श्री. रोहन ए. खंवटे; माननीय आमदार आणि इन्फो टेक कॉर्पोरेशन ऑफ गोवा लिमिटेडचे अध्यक्ष डॉ. चंद्रकांत शेट्ये; डीआयटीई अँड सीचे संचालक श्री. कबीर शिरगावकर; इन्फोटेक कॉर्पोरेशन ऑफ गोवा लिमिटेडचे व्यवस्थापकीय संचालक श्री. प्रवीण वळवटकर, डीआयटीई अँड सीचे संयुक्त संचालक डॉ. मिलिंद साखरदांडे आणि डीआयटीई अँड सीच्या स्टार्टअप आणि आयटी प्रमोशन सेलचे सीईओ श्री. डी. एस. प्रशांत यांच्या उपस्थितीत हा लॅपटॉप वितरण समारंभ आयोजित करण्यात आला होता.
विद्यार्थ्यांना संबोधित करताना माननीय मंत्री श्री. रोहन ए. खंवटे यांनी भविष्य घडवण्यात तंत्रज्ञानाची भूमिका अधोरेखित केली, “आजच्या तरुणांमध्ये तंत्रज्ञानाद्वारे केवळ गोव्यासाठीच नव्हे तर आपल्या संपूर्ण राष्ट्रात प्रभाव निर्माण करण्याची शक्ती आहे. तंत्रज्ञान आता प्रत्येक क्षेत्राचा भाग आहे आणि तुम्हाला या साधनांनी सुसज्ज करून, आम्ही ज्ञान, सर्जनशीलता आणि संधींचे दरवाजे उघडत आहोत. आयटी नॉलेज सेंटर्स आणि गोवा एआय मिशन २०२७ सारख्या उपक्रमांद्वारे, आम्ही आमच्या तरुणांना भविष्यातील नवोन्मेषक, उद्योजक आणि पुढारी बनण्यासाठी तयार करत आहोत. या संधींचा सतत वापर करून शिकण्यासाठी आणि केवळ तुमचेच भविष्य नव्हे तर आपल्या राज्याचे भविष्य घडविण्यासाठी आम्ही प्रोत्साहित करतो.”
या योजनेचा फायदा २०२२ मध्ये सुरु झाल्यापासून, ४५० हून अधिक विद्यार्थ्यांना झाला आहे, ज्यामुळे त्यांना त्यांचा शैक्षणिक अनुभव वाढवणारी डिजिटल साधने आणि संसाधने उपलब्ध झाली आहेत.
संचालक श्री कबीर शिरगावकर म्हणाले, की”आज, आम्ही केवळ लॅपटॉपचे वाटप करत नाही, तर आम्ही आमच्या तरुण विद्यार्थ्यांचा दृढनिश्चय, प्रतिभा आणि आकांक्षा साजरे करत आहोत. वाढत्या डिजिटल जगात यशस्वी होण्यासाठी आवश्यक असलेली साधने प्रदान करून आम्ही त्यांच्या शैक्षणिक प्रवासाला पाठिंबा देण्यासाठी सतत कार्यरत आहोत.”
माहिती तंत्रज्ञान, इलेक्ट्रॉनिक्स आणि कम्युनिकेशन्स खाते तंत्रज्ञानाच्या नेतृत्वाखालील भविष्यात, प्रत्येक नागरिकाला प्रगती करण्यास मदत करण्यासाठी प्रवेश, पायाभूत सुविधा आणि नवोपक्रम यांचा समावेश करून समावेशक डिजिटल सक्षमीकरण चालवत आहे.
