अनियंत्रित होमस्टे रोखण्यासाठी सामूहिक कारवाई गरजेची; उल्लंघनाची तक्रार करण्याचे पर्यटनमंत्र्यांचे जनतेला आवाहन

गोवा खबर : पर्यटन खाते ऑनलाइन ट्रॅव्हल एजन्सी (ओटीए) माध्यमावर सूचीबद्ध असलेल्या निवासस्थानांवर सक्रियपणे लक्ष ठेवून आहे, जेणेकरून ते राज्यात नोंदणीकृत असल्याची खात्री होत आहे, असे आश्वासन पर्यटन मंत्री रोहन खंवटे यांनी दिले आहे.

ते म्हणाले, ओटीए माध्यमाशी संबंधित हॉटेल खोल्या, गेस्टहाऊस आणि इतर निवासस्थानांची सर्व यादी पर्यटन खात्याकडे नोंदणीकृत असल्याची आम्ही खात्री केली आहे.

सध्याच्या आव्हानांवर प्रकाश टाकताना मंत्री खंवटे यांनी नमूद केले, अधिकाऱ्यांना माहिती न देता अनेक सेकंड होम आणि निवासी इमारतींचा पर्यटकांच्या निवासस्थानांसाठी गैरवापर केला जात आहे. या सेकंड होममध्ये येणारे आणि पर्यटक निवासस्थान म्हणून राहणारे लोक अनेकदा योग्य नोंदणीशिवाय येतात. यावर प्राधान्याने लक्ष देणे आवश्यक आहे, असे ते म्हणाले.

सामूहिक जबाबदारीचे महत्त्व अधोरेखित करून खंवटे म्हणाले, सहकारी संस्थांच्या निबंधकांना यासाठी विश्वासात घेतले पाहिजे. संस्थांनी सतर्क राहिले पाहिजे आणि अनियंत्रित मुक्कामाची तक्रार करण्यासाठी, पर्यटन खात्याच्या टोल-फ्री क्रमांक १३६४ वर कॉल करण्यास सर्वांना प्रोत्साहित केले पाहिजे. या समस्येचे निराकरण करण्यासाठी पर्यटन खाते नगरपालिका आणि पंचायतींशी सतत समन्वय साधत आहे.

या प्रकरणाचे गांभीर्य ओळखून, मंत्री म्हणाले, राज्य सरकार, मुख्यमंत्र्यांसह, रहिवासी आणि पर्यटन क्षेत्र दोघांच्याही हिताचे रक्षण करणारा शाश्वत असा उपाय शोधण्यासाठी त्या दिशेने काम करेल.

निवासी सोसायटींमध्ये चालणाऱ्या होमस्टेमुळे स्थानिकांना होणाऱ्या वाढत्या गैरसोयींबद्दल आमदार मायकल लोबो यांनी, गोवा विधानसभा अधिवेशनात उपस्थित केलेल्या प्रश्नाला उत्तर देताना, सदर माहिती देण्यात आली. होमस्टे अनेकदा अनियंत्रित पर्यटकांना आकर्षित करतात आणि परिसरातील वातावरण बिघडवतात, अशी चिंता आमदार लोबो यांनी व्यक्त केली होती.