गोवा वैद्यकीय महाविद्यालयजवळील वाहतूक कोंडीतून तात्काळ दिलासा देण्याची गरज : अमरनाथ पणजीकर

गोवा खबर : गोवा प्रदेश काँग्रेस समितीने गोवा वैद्यकीय महाविद्यालय (जीएमसी) जवळच्या वाहतूक कोंडीबाबत भाजप सरकार आणि संबंधित खात्यांचे प्रशासनिक अपयश व बेपर्वाईचा तीव्र निषेध केला आहे. आज तब्बल ४० मिनिटांहून अधिक वेळ वाहतूक ठप्प होती, ज्यामुळे अनेकांचे जीव धोक्यात आले, विशेषतः त्या रुग्णांचे जे ‘गोल्डन अवर’मध्ये वैद्यकीय उपचारांची गरज असते, असे अमरनाथ पणजीकर यांनी सांगितले.

या वारंवार घडणाऱ्या अराजकतेचे मूळ कारण म्हणजे कुजिरा स्कूल कॉम्प्लेक्समधील अनेक शाळांचे एकाच वेळी सुटणे. पावसाळ्यात पालक खासगी वाहनांमध्ये मुलांना घ्यायला येतात आणि परिणामी भीषण वाहतूक कोंडी होते. ही परिस्थिती प्रत्येक वर्षी उद्भवते, तरीही प्रशासन डोळेझाक करत आहे, हे अत्यंत लाजीरवाणे आहे, असे अमरनाथ पणजीकर म्हणाले.

ही समस्या दरवर्षीची असूनही, अद्याप कोणतेही ठोस उपाययोजना करण्यात आलेली नाही. ५‑१०‑१५ मिनिटांच्या अंतराने शाळा‑महाविद्यालयांची वेळ निश्चित करणे हे मूलभूत पाऊल देखील घेण्यात आलेले नाही. ही केवळ नियोजनातील ढिलाई नाही, तर सामान्य जनतेच्या सुरक्षिततेबद्दलचा पूर्णपणे हलगर्जीपणा आहे. यामुळे कामगार वर्ग, दररोज प्रवास करणारे, आणि विशेषतः GMC कडे उपचारासाठी जाणारे गंभीर रुग्ण अडचणीत येत आहेत, असे पणजीकर म्हणाले.

वाहतूक नियोजनातील हलगर्जीपणामुळे जर आपत्कालीन रुग्णसेवेला विलंब होतो, तर ती गंभीर गुन्हेगारी निष्काळजीपणा ठरतो. भाजप सरकारने याबाबत जबाबदारी स्वीकारावी व ज्या कोणत्याही मृत्यूचे कारण ही अकार्यक्षम व्यवस्था ठरू शकते, त्यासाठी उत्तरदायी धरले जावे.

शिक्षण खाते, वाहतूक पोलीस आणि परिवहन संचालनालय यांनी तात्काळ समन्वय साधून शाळा सुटण्याच्या वेळा नियोजित करणे, वाहतूक नियंत्रण यंत्रणा सक्षम करणे, आणि GMC व कुजिरा शाळा संकुल परिसरात आपत्कालीन वाहतुकीसाठी स्वतंत्र मार्ग तयार करणे, ही तातडीची गरज आहे.

गोव्यातील जनतेला सक्षम प्रशासनाची गरज आहे, सबबींची नाही. भाजप सरकारने जनतेच्या जीवाशी खेळ थांबवून तात्काळ पावले उचलावीत, अन्यथा गंभीर परिणामांना सामोरे जावे लागेल, असा इशारा अमरनाथ पणजीकर यांनी दिला.