गोव्यातील मान्सून पर्यटनाला अधिक समृद्ध करण्यासाठी पाककृती-आधारित अनुभव

गोवा खबर : गोवा सरकारच्या पर्यटन खात्याने जुलै आणि ऑगस्ट महिन्याच्या मान्सून पर्यटन मोहिमेचा एक भाग म्हणून गोव्याच्या समृद्ध अशा पाककृती वारशाच्या प्रचाराचे नियोजन करण्यासाठी एक धोरणात्मक बैठक आयोजित केली होती.

हा उपक्रम व्यापक #GlowOnArrival (#ग्लो ऑन अरायव्हल) मोहिमेअंतर्गत येतो, ज्याचा उद्देश मान्सूनच्या भर पावसाळी हंगामात पर्यटकांना तल्लीन आणि पुनरुत्पादित करणारे अनुभव देणे आहे.

पर्यटन संचालक केदार नाईक यांच्या अध्यक्षतेखाली ही बैठक झाली. गोवा पर्यटन विकास महामंडळाचे (जीटीडीसी) व्यवस्थापकीय संचालक कुलदीप आरोलकर; पर्यटन मंत्र्यांचे ओएसडी शॉन मेंडीस; जीटीडीसीचे महाव्यवस्थापक गेविन डायस; जीटीडीसीचे उपमहाव्यवस्थापक (मार्केटिंग) दीपक नार्वेकर; पर्यटन उपसंचालक जयेश काणकोणकर; ट्रॅव्हल अँड टुरिझम असोसिएशन ऑफ गोवाचे (टीटीएजी) अध्यक्ष  जॅक सुखीजा आणि राज्याच्या आतिथ्य क्षेत्रातील अनेक प्रतिनिधी या बैठकीला उपस्थित होते.

या उपक्रमाचा उद्देश गोव्याला भारतातील आघाडीचे खाद्यपदार्थांचे ठिकाण म्हणून स्थान देण्याचा आहे. ज्यामध्ये राज्यभरात खास पाककृतींचे उत्सव आयोजित केले जातील व जिथे अस्सल गोव्यातील पदार्थांपासून ते प्रादेशिक भारतीय पदार्थ व जागतिक चवींपर्यंत प्रत्येक पाककृती प्रदर्शित केली जाईल. गोव्याची चैतन्यशील संस्कृती, माणसे आणि भूप्रदेशाचा शोध घेण्यासाठी विशेषतः हिरव्यागार आणि तल्लीन करणाऱ्या पावसाळ्यात, अन्न हे कशाप्रकारे एक शक्तिशाली माध्यम बनू शकते, हे अधोरेखित करण्यासाठी ही मोहीम तयार करण्यात आली आहे. पर्यटकांना गोव्याच्या वैविध्यपूर्ण अशा खाद्य वारशाशी जोडण्यासाठी आमंत्रित करणे आणि स्थानिक घटकांसह जागतिक प्रभावांचे अखंड मिश्रण सादर करणे, हा या उपक्रमाचा उद्देश आहे. जिथे शेफ हे स्थानिक गोव्यातील उत्पादनांचा वापर करतील आणि रेस्टॉरंट्स आंतर-सांस्कृतिक पाककृती अनुभव सादर करतील.

या प्रसंगी बोलताना, पर्यटन संचालक केदार नाईक म्हणाले, पर्यटकांना मान्सूनमध्ये गोव्याच्या विविध पाककृती परंपरा आणि विकसित होत असलेल्या अन्न संस्कृतीद्वारे गोव्याचा एक अनोखा पैलू अनुभवण्याची संधी देणे, हा या उपक्रमाचा उद्देश आहे. स्थानिक घटकांपासून तयार केलेले पारंपारिक पावसाळी पदार्थ तसेच समकालीन जागतिक पदार्थ दोन्हीवर भर देऊन, आम्ही गोवा राज्याला एक असे ठिकाण म्हणून सादर करण्याचा प्रयत्न करत आहोत जे अन्न वारसा, सर्जनशीलता आणि जागेप्रती खोल भावना प्रतिबिंबित करते.

#GlowOnArrival या मान्सून मोहिमेचा एक भाग म्हणून, गोवा पर्यटनाने जून ते सप्टेंबर २०२५ पर्यंत महिन्यांनुसार थीमॅटिक जाहिराती देखील सुरू केल्या आहेत. यात पुढीलप्रमाणे संकल्पना समाविष्ट आहेत: जूनमध्ये गोव्यातील उत्सवांचे प्रदर्शन, सांजाव आणि चिखल कालो सारख्या उत्साही अशा हंगामी उत्सवांवर प्रकाश टाकण्यात आला; ऑगस्टमध्ये गोव्यातील साहसी अनुभव, पर्यावरणीय व साहसी अनुभवांना प्रोत्साहन देणे जसे की मान्सून ट्रेक, वृक्षारोपण भेटी आणि साहसी उपक्रम यांचा समावेश असेल. तर सप्टेंबरमध्ये जागतिक पर्यटन दिनासोबत, गोव्यातील विविध आकर्षणांवर भर दिला जाईल. जसे कि, किल्ले आणि स्मारकांपासून ते धबधबे, संग्रहालये आणि निसर्गात सहल यांचा समावेश असेल.

पर्यटन खाते, उद्योग भागधारकांच्या सहकार्याने मान्सूनमध्ये पुनरुत्पादक, सांस्कृतिकदृष्ट्या समृद्ध आणि चवदार पर्यटन स्थळ म्हणून गोव्याचा ब्रँड मजबूत करण्यासाठी काम करत राहणार आहे.