बेतुल मच्छीमार समाजासाठी ४०० मीटर स्मशानभूमी जागेला ओएनजीसीची मान्यता

गोवा खबर : बेतुल येथील मच्छीमार समाजासाठी अखेर स्मशानभूमीचा प्रश्न मार्गी लागण्याची शक्यता निर्माण झाली आहे. ओएनजीसीने ४०० मीटर जागा देण्यास मान्यता दिली असून याबाबत मंगळवारी स्मशानभूमी समिती व ओएनजीसी अधिकाऱ्यांची बैठक पार पडली. या बैठकीत केपेचे उपजिल्हाधिकारी आणि माजी उपमुख्यमंत्री चंद्रकांत (बाबू) कवळेकर देखील उपस्थित होते.

मुख्यमंत्र्यांच्या हस्तक्षेपाने तोडगा

स्मशानभूमीचा गुंता मिटवण्यासाठी मुख्यमंत्री डॉ. प्रमोद सावंत यांनी ओएनजीसी व्यवस्थापन आणि जिल्हाधिकाऱ्यांना स्पष्ट निर्देश दिल्यानंतर ही बैठक आयोजित करण्यात आली. याआधी स्मशानभूमी समितीने माजी उपमुख्यमंत्री बाबू कवळेकर यांच्यामार्फत हा विषय मुख्यमंत्र्यांकडे मांडला होता. मुख्यमंत्र्यांनी समाजाचे म्हणणे ऐकून घेतल्यानंतर तात्काळ कारवाईची सूचना केली होती.

पूर्वीची जागा आणि समाजातील नाराजी

बेतुल मच्छीमार समाजाची पारंपरिक स्मशानभूमी ओएनजीसीच्या संपादित भूभागात येते. ओएनजीसीने ३००० चौ. मी. जमीन बेतुल पंचायतीला दिली होती, परंतु फक्त ११२ चौ. मी. जागा पंचायत घराजवळ स्मशानभूमीसाठी दिली गेली. यामुळे समाजात नाराजी पसरली होती आणि आपली फसवणूक झाल्याचा आरोप मच्छीमार बांधवांनी केला होता.

समितीचा पाठपुरावा आणि पुढील दिशा

स्मशानभूमी समितीने कवळेकर यांच्यासोबत मुख्यमंत्री व ओएनजीसी अधिकाऱ्यांची भेट घेऊन विषयावर जोरदार पाठपुरावा केला. अखेर मुख्यमंत्र्यांच्या सूचनेनंतर ओएनजीसी व उपजिल्हाधिकाऱ्यांनी बैठक घेऊन ४०० मीटर जागा देण्याचे आश्वासन दिले.