गोवा खबर : पर्यटन आणि आर्थिक वाढीस चालना देणारा केंद्रीय अर्थसंकल्प २०२५-२६ जाहीर झाला असून, भारत सरकारच्या पर्यटन क्षेत्रावरील वचनबद्धतेला त्यातून पुष्टी मिळत आहे, असे गोव्याचे पर्यटनमंत्री रोहन खंवटे यांनी सांगितले.
या अर्थसंकल्पात कौशल्य विकास, होमस्टेसाठी मुद्रा कर्ज आणि महत्त्वाच्या स्थळांसाठी सुधारित पर्यटन पायाभूत सुविधांवर भर देण्यात आला आहे. याचा मोठा फायदा गोव्याला होणार असल्याचे त्यांनी नमूद केले.
अध्यात्मिक आणि वेलनेस पर्यटनाला चालना देण्यावर भर दिला गेला असून, हा निर्णय गोव्याच्या पर्यटन विकासासाठी अनुकूल ठरणार आहे. तसेच, वर्धित कनेक्टिव्हिटी आणि सुव्यवस्थित ई-व्हिसा सुविधांमुळे आंतरराष्ट्रीय पर्यटकांचे आगमन वाढेल, अशी अपेक्षा खंवटे यांनी व्यक्त केली. गोव्याला जागतिक पर्यटन नकाशावर अग्रस्थानी आणण्यासाठी सर्व भागधारकांसोबत काम करण्याचा संकल्प त्यांनी व्यक्त केला.
याशिवाय, आयटी क्षेत्राच्या बळकटीकरणासाठी अर्थसंकल्पात केलेल्या तरतुदी सकारात्मक आहेत, असेही खंवटे म्हणाले. डिजिटल पायाभूत सुविधांवर भर, उदयोन्मुख तंत्रज्ञानातील कौशल्य विकास आणि स्टार्टअप्ससाठी प्रोत्साहन योजना यामुळे भारतातील आणि गोव्यातील तरुण उद्योजकांसाठी नवीन संधी निर्माण होतील.
