न्यू इंडिया’त गरिबीला थारा नाही: राष्ट्रपती

0
1071

राष्ट्रपती रामनाथ कोविंद यांनी भारतीय स्वातंत्र्यदिनाच्या पूर्वसंध्येला देशाला प्रथमच संबोधित केले. यावेळी त्यांनी देशाच्या नागरिकांना भारतीय स्वातंत्र्यदिनाच्या शुभेच्छा दिल्या. राष्ट्राला संबोधित करताना राष्ट्रपतींनी देशासाठी बलिदान दिलेल्या स्वातंत्र्यसैनिकांची आवर्जून आठवण काढली. स्वातंत्र्यसैनिकांनी केलेल्या देशसेवाबाबत आपण त्यांचे ऋणी आहोत अशा शब्दात राष्ट्रपती कोविंद यांनी आदरांजली वाहिली. देशासाठी लढणाऱ्या स्वातंत्र्यसैनिकांचा उद्देश राजकीय लक्ष्य गाठणे हा मुळीच नसल्याचे सांगत राष्ट्रपतींनी त्यागाची आवश्यकता आणि महत्त्व अधोरेखित केले.

राष्ट्रपती कोविंद यांनी आपल्या संबोधनात राष्ट्रपिता महात्मा गांधी, भारतीय राज्यघटनेचे शिल्पकार डॉ. बाबासाहेब आंबेडकर, सरदार वल्लभभाई पटेल यांच्या कार्याचा गौरव केला. राष्ट्रपती आपल्या भाषणात पुढे म्हणाले, की आपण लहानपणी पाहिलेली परंपरा अजूनही आठवते, ती म्हणजे कुणाच्याही कुटुंबात एखाद्या मुलीचे लग्न असेल, तर ती संपूर्ण गावाची जबाबदारी असायची. गाव असो वा शहर, ही भावना सतत जागृत ठेवण्याची गरज आहे.

सरकार करत असलेल्या प्रयत्नांचा लाभ सर्वांपर्यंत पोहोचण्यासाठी सर्वांचे योगदान आवश्यक असल्याचेही राष्ट्रपती म्हणाले. सरकारने बेटी बचाओ, बेटी पढाओ अभियान छेडले आहे. परंतु मुलींमध्ये कधीही भेदभाव होणार नाही याची खात्री देणे आमच्यातील प्रत्येकाची जबाबदारी आहे असेही राष्ट्रपती म्हणाले.

देशातील जनतेने जीएसटी स्वीकारले याचा मला विशेष आनंद होत असल्याचेही राष्ट्रपची म्हणाले.

न्यू इंडिया आपल्या डीएनएमध्ये असला पाहिजे. यात माणुसकीचा भाव अंतर्भूत असला पाहिजे. मुलगा-मुलगी किंवा धर्माच्या आधारे ज्या समाजात भेदभाव नसेल असा समाज असायवा हवा. न्यू इंडियात गरिबीला जराही स्थान असणार नाही अशा शब्दात राष्ट्रपती कोविंद यांनी नव्या भारताचा आराखडा देशाच्या नागरिकांसमोर मांडला.

लष्कर, पोलिस, अर्धसैनिक दल आणि शेतकरी देशाची नि:स्वार्थ सेवा करतात. त्यांचा हा गुण सर्वांनी आत्मसात करायला हवा असेही राष्ट्रपती म्हणाले. राष्ट्रपतींनी गॅस सबसिडी सोडणाऱ्या देशातील नागरिकांचीही प्रशंसा केली.

बुद्ध म्हणाले, ‘अप्पो दीप भव’

देशातील गरीब विद्यार्थ्यांच्या शिक्षणासाठी समाजातील सर्व लोकांनी योगदान द्यावे असे आवाहनही राष्ट्पतींनी केले आहे. राष्ट्र निर्माणासाठी आपल्या भावी पिढीवर लक्ष केंद्रित करणे अत्यंत गरजेचे असल्याचेही राष्ट्रपती म्हणाले. गौतम बुद्ध यांनी ‘अप्प दीपो भव’चा संदेश दिला असे म्हणत या वचनाचा अर्थ ‘आपणच आपला दीप बना’ असा गौतम बुद्धांचा संदेश देशातील नागरिकांना दिला. देशातील शिक्षणाचे मापदंड अधिक उंचावण्याची गरज आहे. जर सर्वांनी शिक्षण घेतले सव्वाशे कोटी लोक स्वत:च आपले दीपक बनतील. असे दीपक जेव्हा एकत्र उजळतील तेव्हा सूर्यप्रकाशाप्रमाणे त्यांचा प्रकाश भारताचा मार्ग प्रकाशित करतील असा विश्वास राष्ट्रपतींनी व्यक्त केला.

देशाच्या नागरिकांनी कर भरला पाहिजे. कर भरणे हे आमचे कर्तव्य आहे, याबाबत आपल्याला गर्व असला पाहिजे. याबरोबच देशातील नागरिकांनी दिव्यांग बांधवांचीही विशेष काळजी घेणे गरजेचे आहे. सरकार अनेक कायदे करू शकते, लागूही करू शकते आणि ते आणखी कडकही बनवू शकते, मात्र कायद्याचे पालन करणे ही सर्वांची जबाबदारी आहे असे म्हणत आपल्या जबाबदाऱ्या काटेकोरपणे पाळण्याचे राष्ट्रपतींनी देशाच्या नागरिकांना आवाहन केले.

ज्या लोकांनी देशासाठी बलिदान दिले अशांकडून प्रेरणा घेण्याचा हा काळ आहे असेही राष्ट्रपती आपल्या भाषणात म्हणाले.