गोवा खबर:तब्बल 194 दिवस..21 हजार 600 सागरी मैल…ऊन, पाऊस,थंडी,वादळ, वारा यांचा सामना करत नौदलाच्या 6 महिला अधिकाऱ्यांनी 10 सप्टेंबर 2017 रोजी गोव्यातून सुरु केलेले जग प्रदक्षिणा आज गोव्यात समाप्त झाली.या सागर कन्यांचे स्वागत करण्यासाठी संरक्षण मंत्री निर्मला सीतारामन,नौदल प्रमुख एडमिरल सुनील लांबा आणि 6 महिला अधिकाऱ्यांचे नातेवाईक उपस्थित होते….
तारिणी या नौकेतून  जगभ्रमंती करण्याची कर्तबगारी बजावणाऱ्या नौदलाच्या सहा महिला अधिकारी आज गोव्यात दाखल झाल्या. संरक्षण मंत्री निर्मला सीतारामण यांनी या सागरकन्येंचं स्वागत केलं. या सागरी परिक्रमेबरोबरच त्या समुद्री मार्गाने पृथ्वी परिक्रमा करणाऱ्या पहिल्याच आशियाई महिला ठरल्या आहेत.
लेफ्टनंट कमांडर वर्तिका जोशी, लेफ्टनंट कमांडर प्रतिभा जामवाल, लेफ्टनंट कमांडर पद्रपल्ली स्वाती, लेफ्टनंट ऐश्वर्या बोध्दापती, लेफ्टनंट शोरगप्पन विजया, लेफ्टनंट पायल गुप्ता आदी नौदलाच्या महिला अधिकाऱ्यांचा या चमूत समावेश होता. गेल्या वर्षी सप्टेंबरमध्ये या सहा महिला नौदल अधिकारी समुद्री मार्गे जगभ्रमंतीला निघाल्या होत्या. यासाठी गेल्या दोन वर्षांपासून सहा जणींनी तयारी केली होती. दक्षिण आफ्रिकेतील केप टाऊन हे या भ्रमंतीतील अखेरचं बंदर होतं. त्यानंतर मार्चमध्ये ही बोट परतीच्या प्रवासाला निघाली. या प्रवासात महिला नौदल अधिकाऱ्यांनी २१ हजार ६०० सागरी मैल अंतर पार केलं. या मोहिमेला ‘नाविका सागर परिक्रमा’ असे नाव देण्यात आले होते.
     
यापूर्वी कमांडर दिलीप दोंदे यांनी भारताची पहिली विश्व सागरपरिक्रमा आयएनएसव्ही ‘म्हादई’ या शिडाच्या नौकेच्या साह्याने केली. नंतर त्याच नौकेवर स्वार होत लेफ्टनंट कमांडर अभिलाष टॉमी यांनी विनाथांबा सागरपरिक्रमा केली होती. आता तिसरी विश्व सागरपरिक्रमा ही महिला चमूची पार पडली असून त्यासाठी आयएनएसव्ही तारिणी ही नवी शिडाची नौका गोव्यातच बांधण्यात आली होती. ५६ फूट लांबीच्या या नौकेत आणखी काही अद्ययावत बदल करण्यात आले होते. या प्रवासादरम्यान या महिलांनी चार ठिकाणी थांबे घेतले. ऑस्ट्रेलिया, न्यूझीलंड, फॉकलंड आणि दक्षिण आफ्रिकेत मिळून चार बंदरांवर या बोटीने थांबे घेतले. ५५ फूट लांबीच्या या बोटीतून प्रवास करताना या सागरीकन्यांनी समुद्रातील जैव विविधता, पर्यावरण याचा अनुभव घेतला. हवामानातील बदल त्यानुसार नौकेच्या प्रवासात करावा लागणारा बदल, समुद्री वारे अशा थराराक अनुभव गाठीला घेऊन हा चमू आज गोव्यात परतला. ‘तारिणी’ नौका गोव्याच्या बंदरात येताच सर्वांनी एकच जल्लोष करत या सागरकन्यांचं स्वागत केलं. जगभ्रमंती करताना अनेकवेळा त्यांच्या शिडाला वाईट हवामानाला तोंड द्यावं लागलं. सात मीटर उंची पर्यंतच्या लाटा आणि ताशी ६० किलोमीटर वाऱ्याच्या प्रचंड वेगाचाही सामना करावा लागला. या प्रवासात शार्कने विशेष साथ देते त्यांच्या नौकेसोबत तो बराचकाळ प्रवास केला.